Юртимизда давлат мустақиллигининг 35 йиллиги муносабати билан йирик маданий-маърифий лойиҳа — «Мустақиллик тўйи» фестивали ўтказилиши режалаштирилмоқда. Мазкур кенг қамровли тадбир жорий йилнинг май ойидан сентябрь ойигача мамлакатимизнинг барча ҳудудларини қамраб олади.
Фестиваль «Ягона Ватан, ягона халқ бўлиб, янги ҳаёт ва келажак яратамиз!» шиори остида ташкил этилиб, юртдошлар ўртасида бирдамлик, ватанпарварлик ва миллий қадриятларга ҳурмат туйғуларини мустаҳкамлашга қаратилган.
Ушбу маданий-маърифий ташаббус Республика Маънавият ва маърифат маркази, Ўзбекистон Маҳаллалари уюшмаси, Маданият вазирлиги, Ёшлар ишлари агентлиги, «Маърифат» тарғиботчилар жамияти ҳамда бошқа қатор давлат ва жамоат ташкилотлари ҳамкорлигида амалга оширилади.
Фестиваль доирасида ўндан ортиқ ижтимоий, маънавий ва маданий лойиҳалар ҳаётга татбиқ этилиши кўзда тутилган. Бу лойиҳалар орқали аҳолининг турли қатламлари, айниқса ёшлар ўртасида миллий ғоялар ва замонавий тараққиётга оид қарашлар уйғунлаштирилади.
Маълум қилинишича, мазкур фестиваль ҳақида Республика ташкилий қўмитаси йиғилишида батафсил маълумот берилган. Тадбирлар дастури ҳар бир ҳудуднинг ўзига хослиги ва маданий анъаналарини ҳисобга олган ҳолда шакллантирилади.
Эслатиб ўтамиз, ушбу ташаббус илк бор Президентнинг Ўзбекистон мустақиллигининг 35 йиллигини муносиб нишонлашга бағишланган қарорида илгари сурилган эди. Фестиваль нафақат байрамона муҳит яратиш, балки жамиятда янги ғоя ва мақсадларни тарғиб қилишга хизмат қилиши кутилмоқда.
