Туркияда юзага келган можаро атрофида янги баёнотлар берилмоқда. Аввалроқ 56 ёшли туркиялик эркак ўзбекистонлик 36 ёшли аёл уни 20 минг долларга алдаганини даъво қилган эди. Энди эса аёл бу айбловларни қатъиян рад этмоқда. Бу ҳақда у “АТВ” телеканалига берган интервюсида маълум қилди.
Унинг айтишича, эркак пулларни ўз хоҳиши билан юборган. Аёл бир неча бор “менга пул керак эмас” деб огоҳлантирганига қарамай, у турли миқдорларда маблағ ўтказган. Кейинчалик эса шу пулларни қисм-қисм қилиб қайтаришни талаб қилган.
Аёлнинг сўзларига кўра, улар илк бор таксида танишган. Бошида ўзаро мулоқот яхши кечган ва ҳатто у эркакка нисбатан илиқ ҳислар ҳам туйган. Аммо вақт ўтиб, эркакнинг қўпол муомаласи, айниқса болаларига нисбатан ҳақоратли гаплари сабаб алоқани узган.
Шунингдек, аёл эркак уни тунги кўнгилочар жойларда ишлашга ундаганини маълум қилди. Ҳатто бу борада танишлари орқали иш топиб беришга ҳаракат қилган. Бироқ у бу таклифларни рад этганини таъкидлади.
Яна бир жиддий айбловга кўра, эркак аёлни ижтимоий тармоқлар орқали бой инсонларни алдашга ундаган. Аёл эса бундай таклифларга рози бўлмаганини ва ҳалол меҳнат қилишни афзал кўришини айтган.
Ҳозирда аёл Туркияда оддий ишларда меҳнат қилиб, мустақил ҳаёт кечираётганини билдирди. Унинг таъкидлашича, эркак билан боғлиқ жанжаллар сабаб ҳатто вақтинча уйсиз қолган ҳолатлари ҳам бўлган.
Аёл сўнгги сўзларида яна бир бор ҳеч қачон пул талаб қилмаганини, барча маблағлар эркакнинг шахсий ташаббуси билан юборилганини таъкидлади.
“Zamin”ни Telegram'да ўқинг!
