Taftish.uz иши бўйича терговни Ҳарбий прокуратура олиб бормоқда
Taftish.uz сайти ходимларига нисбатан қўзғатилган жиноят иши бўйича тергов ҳаракатлари Ҳарбий прокуратурага ўтказилди. Мазкур қарор иш материалларида айрим махсус хизмат ходимларининг номлари тилга олингани билан изоҳланмоқда. Товламачилик ва фирибгарликда гумонланаётган шахслар устидан 400 дан ортиқ фуқаро шикоят қилган бўлиб, тергов жараёнлари махфий тарзда олиб борилмоқда. Ишнинг ўзига хос хусусиятлари туфайли келгусида суд мажлислари ёпиқ тарзда ўтказилиши мумкин.
Taftish.uz сайти ходимларига оид жиноят иши бўйича тергов ишларини эндиликда ҳарбий прокурорлар олиб бораётгани маълум қилинди.
Бу ҳақда жамоатчилик фаоли Абдураҳмон Ташанов ахборот берган.
Маълумотларга кўра, мазкур иш доирасида гумонланувчилар товламачилик ва фирибгарлик ҳолатлари бўйича жавобгарликка тортилиши мумкин. Улар жорий йилнинг январ ойида қўлга олинган эди.
Ҳозиргача ушбу иш юзасидан 400 дан ортиқ фуқаронинг мурожаатлари кўриб чиқилгани қайд этилмоқда.
Шунингдек, иш материалларида айрим махсус хизмат ходимларининг номи тилга олингани сабабли тергов Ҳарбий прокуратура ихтиёрига ўтказилган.
Тергов жараёнига оид айрим маълумотлар махфий ҳисобланиб, суд муҳокамаси ҳам ёпиқ тарзда ўтказилиши мумкинлиги айтилмоқда.
Изоҳлар 0
…