O‘zbekistonda o‘tgan 10 oyda oilaviy zo‘ravonlik sabab ma’muriy javobgarlikka tortilganlar soni e’lon qilindi. Oliy sud matbuot kotibi Aziz Obidovning ma’lumotiga ko‘ra, Ma’muriy javobgarlik to‘g‘risidagi kodeksning 59-2-moddasi asosida 10 003 nafar shaxs javobgarlikka tartilgan. Mazkur modda ta’lim, sog‘liq va mehnat huquqlariga to‘sqinlik qilish, sha’nni tahqirlash, mol-mulkka zarar yetkazish, qo‘rqitish, kaltaklash yoki yengil tan jarohati yetkazish kabi xatti-harakatlar uchun jarima yoki ma’muriy qamoqni nazarda tutadi.
Shu bilan birga, zo‘ravonlikka uchragan ayollar o‘rtasida o‘tkazilgan so‘rov ham jiddiy holatni ko‘rsatdi: har beshinchi ayol o‘z joniga qasd qilish haqida o‘ylab ko‘rgan. Andijonda bu ko‘rsatkich 33,3 foiz bo‘lgan bo‘lsa, Navoiyda 6 foizgacha tushadi — bu hududlar bo‘yicha ruhiy bosim darajasidagi katta tafovutni anglatadi.
Ayollar stressni asosan jismoniy faollik va uy ishlari bilan yengishga harakat qiladi (29,2%), ba’zilari yolg‘iz qolishni afzal ko‘radi (23,9%), 22,5 foizi hissiy portlashlar orqali reaksiya qiladi. Faqat 11,1 foiz ayol yaqinlari bilan gaplashib yengillik oladi. 6,7 foiz esa stressdan chiqishda qiynalganini aytgan — bu maqsadli psixologik va ijtimoiy yordamga ehtiyoj katta ekanini ko‘rsatadi.
Jamiyatdagi oilaviy zo‘ravonlik holatlari kamayishi uchun faqat jazo choralari emas, balki tizimli profilaktika, ruhiy qo‘llab-quvvatlash va axborot ishlari ham muhim ahamiyatga ega.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
