АҚШ президенті Дональд Трамп 13 қазан күні Израиль парламенті — Кнессетте сөз сөйледі. Jerusalem Post басылымының хабарлауынша, оның сөзін депутаттар қол шапалақтап қарсы алды. Трамп бұл сапарын “өмірімдегі ең үлкен құрметтердің бірі” деп атады.
Президенттің айтуынша, ХАМАС бейбітшілік келісіміндегі қарусыздану тармағын қабылдаған. «ХАМАС қарусыздану жоспарын орындауға келісті. Бұл — бейбітшіліктің бастауы», — деді Трамп. Ол сондай-ақ Газа секторындағы көп жылдық қақтығыстың аяқталғанын және аймақта жаңа кезең басталғанын айтты.
Кнессет спикері Амир Охана сөзден кейін Трампты жоғары бағалады. «Біз АҚШ Конгресінің спикері Майк Джонсонмен бірге келесі жылы Сізді Бейбітшілік үшін Нобель сыйлығына ұсынуды ұсынамыз. Бұған лайық адам жоқ, мырза Президент», — деді ол.
Израиль оппозициясының жетекшісі Яир Лапид те сөз сөйлеп, «Бұл әлемде жақсылық пен жамандық бар. Егер сіз ХАМАС, “Хезболла” немесе Иран режимінің жағында болсаңыз — зұлымдық жағындасыз. Израиль жағында болсаңыз — әділет жағындасыз», — деді.
Осы сәтте екі депутат — Айман Оде мен Офер Кассиф — Трамп сөйлеп тұрған кезде “геноцид” деген жазуы бар плакат көтергені үшін залдан шығарылды.
Трамп өз сөзінде Израильге көрсетілген әскери көмек туралы да айтты. «Біз Израильге көп қару бердік. Биби (Нетаньяху) маған қоңырау шалып, белгілі бір қаруларды сұрағанда, мен оларды дайындап жібердім. Олар ең заманауи әрі тиімді қарулар болды, және дәл солар бейбітшілікке жол ашты», — деді ол.
Президенттің айтуынша, Газаны демилитаризациялау жоспары аймақтағы көптеген елдердің қолдауына ие болған. «ХАМАС қарусыздандырылады. Израильдің қауіпсіздігіне енді ешқандай қауіп төнбейді», — деді Трамп.
Бұған дейін ХАМАС кепілдегі адамдарды кезең-кезеңімен босата бастағаны хабарланған. Бірінші топта 7 адам, екіншісінде — 13 адам Израильге қайтарылған.
Келісімге сәйкес, кепілдегі адамдардың орнына Израиль түрмелерінен өмір бойы бас бостандығынан айырылған 250 палестиналық тұтқын және соғыс басталғаннан бері ұсталған 1700 адам босатылуы тиіс.
Осылайша, Дональд Трамптың Израильдегі сөзі тек дипломатиялық оқиға емес, әлемдік саясат сахнасындағы жаңа тарихи кезең ретінде бағалануда.
“Zamin”-ді Telegram-нан оқыңыз!
