Солтүстік Қазақстанда салауатты өмір салтын таңдаған тұрғындардың саны артып келеді. Tengrinews ақпаратына сәйкес, ел бойынша 21 ауыл алкоголь өнімдерінен толық бас тартқан. Бұл қозғалыс бірнеше жыл бұрын басталып, бүгінде кең қолдауға ие болып отыр.
Соңғы мысал ретінде Қызылжар ауданындағы Байсал ауылы аталды. Мұнда ақсақалдар бастамашы болып, жастармен бірге бүкіл ауыл халқы алкогольден бас тарту туралы шешім қабылдаған.
«Ауылымызда есіктер ашық, ешкім ешнәрсеге тимейді. Ішімдік жоқ, орта таза. Бұл – біздің мақтанышымыз», — дейді Байсал тұрғыны.
Мәлімет бойынша, ауылда шамамен 60 фермерлік қожалық бар, олардың негізгі бағыты – мал және құс шаруашылығы. Алкогольден бас тарту тек денсаулық үшін ғана емес, келесі ұрпақ үшін де таза орта қалыптастыру қадамы ретінде қарастырылады.
Полиция деректері бойынша, Байсал мен осындай “трезвый ауылдарда” қылмыс деңгейі 14 пайызға төмендеген. Бұл бастаманың тиімділігін дәлелдейді.
Қазір Қазақстан бойынша мұндай ауылдардың саны өсіп келеді: бұрын олардың саны 13 болса, бүгінде 21-ге жеткен. Сонымен қатар, Батыс Қазақстандағы 33 ауылда алкогольге ресми түрде тыйым салынған.
Мамандардың пікірінше, бұл қозғалыс тек салауатты өмір салтын насихаттап қана қоймай, қоғам санасын өзгертудің маңызды кезеңіне айналуда. Мұндай ауылдар бүкіл елге үлгі болып отыр.
“Zamin”-ді Telegram-нан оқыңыз!
