Президент Шавкат Мирзиёевтің төрағалығымен өткен жиында бірінші тоқсандағы экономикалық өсім талданып, өнеркәсіп және экспорт саласындағы кемшіліктер қаралды. Атап айтқанда, өнеркәсіп көрсеткіштері бойынша болжамды орындамаған Ташкент қаласының Сергелі және Шайхантахур, сондай-ақ Жызақ, Қашқадария және басқа да облыстардағы барлығы 13 аудан әкімдеріне қатысты тәртіптік шаралар көру тапсырылды.
Бұл туралы Spot.uz хабарлайды.
Электротехника саласында мысты қайта өңдеу көлемі төмен болғандықтан, өндіріс өсімі күтілген 11,2 пайыздың орнына 7,8 пайызды құрады, ал экспорт жоспары небәрі 57 пайызға орындалды.
Мемлекет басшысы жауапты тұлғаларға кәсіпорындардағы мәселелерді жергілікті жерде шешуді және екінші тоқсанның соңына дейін электротехника өндірісін 25 трлн сумға, ал экспортты 1 млрд АҚШ долларына жеткізу міндетін қойды.
Жиында еңбек өнімділігін арттыру мәселесіне де ерекше назар аударылды. Мирзиёев тоқыма, жиһаз жасау және құрылыс материалдары сияқты драйвер салалардың қауымдастықтарын шетелдік тәжірибені таратпағаны үшін сынға алды.
Экономика және қаржы министрлігіне 100 кәсіпорында тиімділікті арттыру бағдарламасын енгізу үшін 30 млн доллар грант тарту тапсырылды.
Экспорт көрсеткіштері 70 пайыздан төмен болған Жызақ, Науаи, Наманган сияқты қалалар мен бірқатар аудан басшыларына ескерту жасалды. Егер жарты жылдық қорытындысы бойынша оң өзгерістер болмаса, аталған аудан әкімдеріне қатысты қатаң шаралар көрілетіні мәлімделді.
Сондай-ақ, жаңа нарықтарды табу және логистика мәселелерін шешу үшін біртұтас жүйе құру қажеттігі атап өтілді.
“Zamin”-ді Telegram-нан оқыңыз!
