Өзбекстанда валюта операцияларын жүзеге асыру тәртібі одан әрі жетілдірілді. Өзбекстан Орталық банкі қабылдаған жаңа шешімге сәйкес, аталған салада бірқатар маңызды өзгерістер мен толықтырулар енгізілді.
Бұл жаңалықтар, ең алдымен, кәсіпкерлер мен халық үшін процестерді жеңілдетуге бағытталғанымен маңызды.
Жаңа тәртіп бойынша, заңды тұлғалар шетел валютасын сатып алу үшін ұсынған өтінімдерде кішігірім техникалық немесе емле қателері анықталса, оларды қайта жіберудің қажеті жоқ. Енді клиенттер бұл кемшіліктерді сол жерде түзету мүмкіндігіне ие болады.
Реттеуші атап өткендей, іс жүзінде дәл осындай ұсақ қателер себебінен көптеген операциялардан бас тартылатын және бұл кәсіпкерлер үшін артық уақыт жоғалтуға әкеп соғатын.
Сондай-ақ, банк кассалары арқылы қолма-қол шетел валютасын беру тәртібі де нақты белгіленді. Оған сәйкес, жеке тұлғалар өз шоттарындағы қаражат шеңберінде валютаны шектеусіз шешіп алу құқығына ие болады.
Ал заңды тұлғалар үшін қолма-қол валюта тек белгіленген және негізделген мақсаттар аясында беріледі.
Тағы бір маңызды жаңалық — барлық валюта айырбастау операциялары, соның ішінде онлайн түрде жүзеге асырылатын транзакциялар бірыңғай жүйе арқылы есепке алынады. Бұл нарықтағы ақша айналымы мен қозғалысын ашық бақылауға, талдау жасауға және бақылауды күшейтуге қызмет етеді.
Шешім аясында жеке тұлғалар үшін де бірқатар қолайлылықтар енгізілді. Енді азаматтығы қай мемлекетке тиесілі екеніне қарамастан, барлық жеке тұлғалар банк шоттары арқылы жеке мақсаттарда (яғни саудалық емес операцияларда) бір-біріне еркін ақша аудара алады.
Бұдан бөлек, шетелдіктер де ел ішінде жарғылық қорға қаражат салу, қайырымдылық жасау немесе мұрагерлікке байланысты операцияларды жүзеге асыру мүмкіндігіне ие болды.
Капитал нарығына қатысушылар үшін де айтарлықтай жеңілдіктер жасалды. Енді заңды тұлғалар шетел валютасында шығарылған бағалы қағаздар бойынша төлемдерді жүзеге асыру үшін валюта сатып алу кезінде артық құжаттар ұсынбайды.
Ол үшін бағалы қағаздың шығарылғанын растайтын негізгі құжаттың өзі жеткілікті болады.
Сонымен қатар, шетелдік инвесторлар үшін де маңызды мүмкіндіктер ашылды — олар қор нарығында бағалы қағаздарды сатудан түскен қаражаттарын өз өтініштері негізінде еркін түрде шетелге алып шыға алады. Бұл елдің инвестициялық ортасын одан әрі тартымды ете түседі.
Анықтама ретінде айта кеткен жөн, аталған шешім 2026 жылғы 30 наурызда қабылданып, Өзбекстан Әділет министрлігі тарапынан 22 сәуірде мемлекеттік тіркеуден өткізілді. Құжат ресми жарияланған күннен бастап күшіне енді.
Қысқасы, жаңа өзгерістер валюта нарығындағы процестерді жеңілдетуге, ашықтықты арттыруға және кәсіпкерлік қызмет үшін бұдан да қолайлы жағдай жасауға қызмет етеді. Бұл экономиканың алдағы дамуына оң әсерін тигізеді деп күтілуде.
