Жапонияның жетекші брокерлік компаниялары жеке инвесторлар үшін крипто-активтерге негізделген инвестициялық қорларды құруға кірісті. SBI Securities және Rakuten Securities сияқты ірі қаржы институттары өз өнімдерін әзірлеу үстінде, ал Nomura сияқты басқа да ірі ойыншылар заңнамалық база аяқталғаннан кейін бұл нарыққа шығуды жоспарлап отыр. Бұл туралы Cointelegraph.com хабарлайды .
Nikkei хабарлауынша, SBI Securities өзінің еншілес кәсіпорны SBI Global Asset Management әзірлеген Bitcoin және Ethereum сияқты ликвидті активтерге бағытталған ETF және инвестициялық қорларды сатылымға шығаруды көздеп отыр. Rakuten Securities болса, өз инвестициялық басқару бөлімімен бірлесіп, смартфон қосымшалары арқылы тікелей сауда жасауға мүмкіндік беретін құралдарды дайындауда.
Бұл бастама жапондық инвесторлардың крипто-активтерге қол жеткізу мүмкіндігін түбегейлі өзгертеді деп күтілуде. Қазіргі уақытта цифрлық активтерді сатып алу үшін арнайы крипто-биржа шотын ашу немесе әмиян жасау талап етіледі. Инвестициялық қорлар болса, қолданыстағы бағалы қағаздар шоттары арқылы крипто-нарыққа шығуға мүмкіндік беріп, техникалық кедергілерді жояды.
Жапонияның Қаржылық қызметтер агенттігі 2028 жылға дейін Инвестициялық қорлар туралы заңды қайта қарауды жоспарлап отыр. Бұл өзгерістер крипто-активтерді инвестициялық қорлардың құрамына енгізілуі мүмкін ресми активтер тізіміне қосуды көздейді. Сондай-ақ, үкімет крипто-ETF өнімдеріне рұқсат беру мәселесін де қарастыруда.
“Zamin”-ді Telegram-нан оқыңыз!
