Әлеуметтік желілерде өзін ірі дистрибьютор ретінде таныстырып жүрген Хайрулло Шокировқа қатысты аса ірі мөлшердегі алаяқтық фактісі бойынша қылмыстық іс қозғалды. Бұл туралы Ташкент қалалық Ішкі істер бас басқармасының баспасөз қызметі хабарлады.
Мәліметтерге сәйкес, ІІББ жанындағы Тергеу басқармасы Қылмыстық кодекстің 168-бабы 4-бөлігінің «а» тармағы — яғни аса ірі мөлшердегі алаяқтық белгілері бойынша тергеу әрекеттерін жүргізуде. Тергеу барысында 1986 жылы туған Хайрулла Убайдуллаевич Шокиров алдау және сенімді теріс пайдалану арқылы көптеген азаматтарға материалдық залал келтіргені анықталған.
Құқық қорғау органдарының мәлімдеуінше, күдікті Instagram, Telegram және YouTube платформаларында Хайрулло Шокиров атымен парақшалар жүргізіп, өзін тәжірибелі кәсіпкер әрі ірі дистрибьютор ретінде көрсеткен. Ол желіде бұл қызметпен 2004 жылдан бері айналысып келеді-мыс деп, аудиторияның сеніміне кіруге тырысқан.
Тергеу материалдарында айтылғандай, Шокиров шетелден көп мөлшерде анар шырыны мен салқындатқыш сусындар әкелуге және оларды Өзбекстан бойынша сауда нүктелеріне жеткізуге өкілеттігі бар екені туралы жалған ақпарат таратқан. Осы сылтаумен ол азаматтарға «дистрибьюторлық қызмет» арқылы жоғары табыс пен үлкен пайыздар уәде етіп, олардың сеніміне кірген.
Алайда, тергеу дерегінше, бұл уәделер негізсіз болып шыққан, соның салдарынан жәбірленушілер аса ірі мөлшерде материалдық шығынға ұшыраған. Қазір Хайрулло Шокиров күдікті ретінде қылмыстық іске тартылып, оған қатысты қамауға алу түріндегі бұлтартпау шарасы қолданылған.
Ташкент қалалық ІІББ аталған тұлғаның қылмыстық әрекеттерінен жапа шеккен азаматтарды немесе іс бойынша қосымша мәліметі бар адамдарды тергеу органдарына жүгінуге шақырды. Өтініштер Тергеу басқармасының 71−206−40−99, 71−206−42−52 телефон нөмірлері немесе 102 қысқа нөмірі арқылы қабылданады.
Ішкі істер органдары кез келген ақпарат қылмысты толық ашуға, басқа ықтимал жәбірленушілерді анықтауға және әділдіктің орнауына көмектесуі мүмкін екенін атап өтті. Осыған байланысты азаматтарды әлеуметтік желілердегі күмәнді «инвестиция» және «дистрибьюторлық» ұсыныстарға қатысты сақ болуға шақыруда.
“Zamin”-ді Telegram-нан оқыңыз!
«Меҳмон» тобындағы келушілер бұл жарияланымға пікір қалдыра алмайды.
