Бекабад қаласында жұртшылықты дүр сілкіндірген оқиғаға қатысты жаңа мәліметтер пайда болды. ІІБ қызметкері көлікпен қағып, кейін Фарход каналына тастаған 43 жастағы азаматтың мәйіті 80 күннен кейін анықталды. Бұл туралы марқұмның туыстары хабарлады.
Еске салайық, оқиға 2025 жылғы 11 желтоқсан күні болған. Мәліметтерге сәйкес, Бекабад қалалық ІІБ-нің аға жедел уәкілі мас күйінде рөлге отырған. Жолда азаматты қағып кеткеннен кейін, ауыр қылмыстың ізін жасыру мақсатында мәйітті “Nexia” автокөлігіне тиеп, оқиға орнынан алысырақ жерге апарған.
Кейін ол жұбайын шақырған. Әйел “Matiz” автокөлігімен келген. Уақыт жоғалтпай, ерлі-зайыптылар мәйітті екінші көлікке ауыстырып, оқиға орнынан шамамен 35 километр қашықтықтағы Фарход каналына тастағаны айтылуда.
Осыдан кейін іздестіру жұмыстары мәйіт тасталған жерден Сырдария өзеніне дейінгі канал бөлігінде жүргізілген. Арадан шамамен үш айға жуық уақыт өткен соң, марқұмның мәйіті табылғаны хабарлануда.
