Кейн Левандовскийдің рекордын жаңартуды көздейді

Германия чемпионатының ағымдағы маусымында Гарри Кейн 18 гол соқты. Ағылшын шабуылшысы Бундеслигадағы ең ірі жетістіктердің бірі — Роберт Левандовски орнатқан рекордты жаңартуды мақсат етіп отырғанын айтты.

Поляк футболшысы 2020/2021 жылғы маусымда Бундеслигада 41 гол соғып, тарихи нәтижеге қол жеткізген еді. Кейн Sky Germany басылымына берген сұхбатында бұл көрсеткішке жету мүмкіндігін жоққа шығармады: «Левандовскидің рекорды?

Менің ойымша, бұл мүмкін, әсіресе, маусымды қалай бастағанымды ескерсек. Әлі алда ұзақ жол бар.

Төрт-бес ай бойы осы деңгейімді сақтап қалуым керек. Футболдағы ең қиыны — ұзақ уақыт бойы тұрақтылықты сақтау.

Бұл рекорд өте ерекше, оны жаңарту ерекше қиын болатынын түсінемін. Бірақ мен әрқашан өзіме осындай үлкен мақсаттар қоюды ұнатамын», — деді шабуылшы.

14 турдан кейін «Бавария» Бундеслигада 38 ұпаймен көш бастап келеді: команда 12 мәрте жеңіске жетіп, 2 ойынды тең нәтижемен аяқтады.