Meta компаниясы өзінің негізгі платформалары — Instagram, Facebook және WhatsApp үшін ақылы жазылым жоспарларын жаһандық деңгейде енгізе бастады. Енді пайдаланушылар бірнеше доллар төлеп, қосымша функцияларға ие бола алады. Атап айтқанда, Instagram Plus пен Facebook Plus айына 3,99 доллар, ал WhatsApp Plus 2,99 доллар болып белгіленді. Бұл туралы Techcrunch.com хабарлайды .
Жаңа жазылымдар аясында пайдаланушыларға профильді жекелендіру, «супер реакциялар» және стористер бойынша кеңейтілген аналитикалық мәліметтер ұсынылады. Мысалы, Instagram Plus жазылушылары өз стористерін кімдер қайталап көргенін біле алады, сторис мерзімін 24 сағаттан асырып ұзарта алады және арнайы қаріптерді қолдана алады. Сондай-ақ, пайдаланушылар стористерді көрушілер тізімінде көрінбей-ақ тамашалау мүмкіндігіне ие болады.
Meta сонымен қатар бизнес өкілдері, контент жасаушылар және жасанды интеллект әуесқойларына арналған «Meta One» бренді астындағы жаңа жоспарларын сынақтан өткізуді бастады. Бұл қадам компанияға тек жарнамалық табысқа ғана тәуелді болмай, өз кіріс көздерін әртараптандыруға мүмкіндік береді. Компания өкілдерінің айтуынша, жаңа Plus жоспарлары қолданыстағы Meta Verified қызметін алмастырмайды, оны толықтырады.
Бұл жаңалық әлеуметтік желілерді белсенді қолданушылар мен өз аудиториясын жақсырақ түсінгісі келетін блогерлерге арналған. Болашақта Meta AI мүмкіндіктерін қамтитын неғұрлым күрделі жазылым пакеттері ұсынылады деп күтілуде. Әзірге бұл функциялар кезең-кезеңімен барлық аймақтарда іске қосылуда.
“Zamin”-ді Telegram-нан оқыңыз!
