Өзбекстандағы отбасылардың бақыт деңгейі анықталды

«Отбасы және гендер» ғылыми-зерттеу институты жүргізген сауалнама нәтижелері бойынша, Өзбекстандағы отбасылардың жалпы бақыт индексі 0,618 балды құрады. Зерттеу 2026 жылдың наурыз-сәуір айларында өткізілді.

Сауалнамаға республика бойынша 12 мың 697 респондент қатысты. Онда отбасылардың экономикалық жағдайы, жұмыспен қамтылу деңгейі, білім алу мүмкіндіктері, салауатты өмір салты және мемлекеттік қызметтерге қанағаттану жағдайы зерттелді.

Әдістемеге сәйкес, бақыт индексі -1-ден +1-ге дейін бағаланады. +0,5-тен жоғары нәтиже «жоғары деңгей» ретінде қабылданады. Сондықтан 0,618 балдық көрсеткіш отбасылардың өмірге қанағаттану деңгейінің жоғары екенін көрсетеді.

Мәліметтерге қарағанда, бұл көрсеткіш 2023 жылы 0,560 балды, ал 2025 жылы 0,611 балды құраған. Соңғы жылдары бақыт индексінің біртіндеп өсіп келе жатқаны байқалады.

Зерттеуде отбасылық құндылықтар, демографиялық тұрақтылық және отбасылық өмірге қанағаттану ең жоғары бағаланған бағыттар ретінде көрсетілген.