«Реал Мадрид» ярим ҳимоячиси Аурелиен Чуамени фаолиятидаги энг оғир davr ва мухлислар томонидан билдирилган танқидлар ҳақида сўзлаб берди. Франциялик футболчи Мадрид клубидаги талаблар жуда юқори эканини ва ҳар қандай хато аёвсиз жазоланишини таъкидлади. Бу ҳақда Goal.com хабар беради.
Чуаменининг сўзларига кўра, у бир муддат жамоанинг барча муваффақиятсизликларида асосий айбдорга айлантирилган. «Мени қурбонлик эчкиси қилишди.
Ўйиннинг дастлабки 20 дақиқасида тўпга тегишим билан бутун стадион ҳуштак чаларди. Бундай вазият ё сизни синдиради, ёки бор эътиборингизни фақат ўйинингизга қаратишга мажбур қилади», — дейди футболчи.
Ярим ҳимоячи «Реал Мадрид» каби клубда ўйнаш катта масъулият ва руҳий тайёргарлик талаб қилишини қайд этди. Унинг фикрича, мухлислар ва OAV доимо муҳокама қилади, бироқ профессионал футболчи фақат ўзи назорат қила оладиган нарсаларга, яъни майдондаги ҳаракатларига эътибор бериши лозим.
Жорий мавсумда 26 ёшли Чуамени барча мусобақаларда 44 та учрашувда майдонга тушиб, 2 та гол ва 2 та ассист муаллифига айланди. Бироқ у Чемпионлар лигаси чорак финалида «Бавария»га қарши баҳсда сариқ карточка олиб, жавоб ўйинини ўтказиб юборди.
Якунда «Реал Мадрид» турнирни тарк этди.
Ҳозирда «қироллик клуби» Испания чемпионатида «Барселона»дан 9 очко ортда қолмоқда. Испания кубогидан ҳам чиқиб кетган жамоа учун ушбу мавсум совринсиз якунланиш хавфи мавжуд.
“Zamin”ни Telegram'да ўқинг!
