«Астон Вилла» собиқ ҳужумчиси Габби Агбонлахор «Эвертон»да ижара асосида тўп сураётган Жэк Грилишни ҳимоя қилиб чиқди. Аввалроқ ижтимоий тармоқларда Англия терма жамоаси аъзосининг Манчестердаги барлардан бирида ухлаб ётгани акс этган суратлар тарқалган эди. Бу ҳақда Goal.com хабар беради.
Ҳозирда оёғидаги жиддий жароҳат сабабли мавсумнинг қолган қисмини ўтказиб юбораётган 30 ёшли футболчи дўстлари билан ҳордиқ чиқарган. Агбонлахорнинг сўзларига кўра, Грилиш жароҳатдан тикланиш учун қаттиқ меҳнат қилмоқда ва июл ойида машғулотларга қайтишни режалаштирган.
«Мен ҳам шундай вазиятларга тушганман. Бу одамларнинг нима билан шуғулланаётганини кўрсатади.
Шахсий ҳаётингиз билан шуғуллансангиз бўлмайдими? Жэк жароҳатидан қутулиш учун борини бермоқда», — деди Агбонлахор talkSPORT эфирида.
«Рейнжерс» афсонаси Алли Мкоист ҳам замонавий технологиялар машҳур инсонлар ҳаётини қийинлаштираётганини таъкидлади. Унинг фикрича, камерали телефонлар дунёдаги энг ёмон ихтиро бўлиб, инсонларнинг шахсий дахлсизлигига путур етказмоқда.
Грилиш 2021 йилда «Астон Вилла»дан «Ман Сити»га 100 миллион фунт эвазига ўтган эди. Жорий мавсумда у «Эвертон» сафида иккита гол ва олтита голли узатмани амалга оширишга улгурди, бироқ февраль ойидаги жароҳат уни Эвро-2024 ва Жаҳон чемпионати саралаш ўйинларидан маҳрум қилди.
“Zamin”ни Telegram'да ўқинг!
