«Real Madrid» yarim himoyachisi Aurelien Chuameni faoliyatidagi eng og'ir davr va muxlislar tomonidan bildirilgan tanqidlar haqida so'zlab berdi. Fransiyalik futbolchi Madrid klubidagi talablar juda yuqori ekanini va har qanday xato ayovsiz jazolanishini ta'kidladi. Bu haqda Goal.com xabar beradi.
Chuamenining so'zlariga ko'ra, u bir muddat jamoaning barcha muvaffaqiyatsizliklarida asosiy aybdorga aylantirilgan. «Meni qurbonlik echkisi qilishdi.
O'yinning dastlabki 20 daqiqasida to'pga tegishim bilan butun stadion hushtak chalardi. Bunday vaziyat yo sizni sindiradi, yoki bor e'tiboringizni faqat o'yiningizga qaratishga majbur qiladi», — deydi futbolchi.
Yarim himoyachi «Real Madrid» kabi klubda o'ynash katta mas'uliyat va ruhiy tayyorgarlik talab qilishini qayd etdi. Uning fikricha, muxlislar va OAV doimo muhokama qiladi, biroq professional futbolchi faqat o'zi nazorat qila oladigan narsalarga, ya'ni maydondagi harakatlariga e'tibor berishi lozim.
Joriy mavsumda 26 yoshli Chuameni barcha musobaqalarda 44 ta uchrashuvda maydonga tushib, 2 ta gol va 2 ta assist muallifiga aylandi. Biroq u Chempionlar ligasi chorak finalida «Bavariya»ga qarshi bahsda sariq kartochka olib, javob o'yinini o'tkazib yubordi.
Yakunda «Real Madrid» turnirni tark etdi.
Hozirda «qirollik klubi» Ispaniya chempionatida «Barselona»dan 9 ochko ortda qolmoqda. Ispaniya kubogidan ham chiqib ketgan jamoa uchun ushbu mavsum sovrinsiz yakunlanish xavfi mavjud.
“Zamin”ni Telegramʻda oʻqing!
