Бугун, 28 апрель куни Ўзбекистон Президенти Шавкат Мирзиёев Фарғона шаҳрида барпо этилган замонавий IT-парк мажмуасига ташриф буюриб, у ерда яратилган шароит ва имкониятлар билан яқиндан танишди. Бу ҳақда давлат раҳбари матбуот хизмати маълум қилди.
Қайд этилишича, мазкур мажмуа Президентнинг 2024 йил август ойида вилоятга қилган ташрифи давомида берган топшириқлари асосида қисқа муддатда бунёд этилган. Лойиҳага жами 150 миллиард сўм бюджет маблағлари йўналтирилиб, натижада замонавий ва кўп функцияли IT-марказ барпо этилган.
Ушбу мажмуа бир вақтнинг ўзида 200 нафаргача фойдаланувчини қамраб олиш имконига эга бўлиб, йилига 3 мингдан ортиқ ёшларни ўқитиш, уларни амалий лойиҳаларга жалб қилиш ҳамда ахборот технологиялари хизматларини кўрсатиш имкониятини яратади.
Марказда фрилансерлар ва дастурчилар учун қулай коворкинг ҳудудлари, резидент компаниялар учун эса тўлиқ жиҳозланган замонавий офислар ташкил этилган. Энг муҳими, бу ерда таълим, ишлаб чиқариш ва хизмат кўрсатиш жараёнлари ўзаро интеграциялашган ҳолда йўлга қўйилган. Бу эса ёшларнинг ўзини ўзи банд қилишига, замонавий касбларни эгаллашига ва барқарор даромад топишига хизмат қилмоқда.
Сўнгги йилларда Фарғона вилоятида IT хизматлари ҳажми сезиларли даражада ошгани қайд этилди. Хусусан, соҳа 4 баробарга кенгайиб, экспорт ҳажми 23 миллион доллардан ортган. Ҳозирда вилоятда “IT-Парк” резидентлари сони 139 тага етган бўлиб, 2025 йилда 22,7 миллион долларлик хизматлар экспорт қилинган.
Янги IT-парк доирасида эса янада катта мақсадлар белгиланган. Жумладан, резидентлар сонини 200 нафарга етказиш, 700 та янги иш ўрни яратиш, хизматлар ҳажмини кескин ошириш ҳамда экспорт кўрсаткичларини 30 миллион долларга етказиш режалаштирилган.
Келгусида ушбу мажмуа негизида сунъий интеллект технологияларига ихтисослашган алоҳида марказ ташкил этиш кўзда тутилган. Шунингдек, бошқарув тизимларини рақамлаштиришга қаратилган инновацион лойиҳалар, дастурлаш, график дизайн, компьютер саводхонлиги ва инглиз тили бўйича замонавий ўқув курслари йўлга қўйилади.
Бундан ташқари, стартаплар учун венчур молиялаштириш, грант дастурлари ва акселерация лойиҳаларини жорий этиш орқали ёш тадбиркорларни қўллаб-қувватлаш режалаштирилган.
Ташриф давомида Шавкат Мирзиёев IT-парк резидентлари ҳамда соҳада фаолият юритаётган ёшлар билан самимий мулоқот ўтказди. Улар томонидан илгари сурилган истиқболли ғоя ва ташаббуслар юқори баҳоланиб, ҳар томонлама қўллаб-қувватланиши таъкидланди.
