Шанба куни Ливерпул жамоаси барча учун кутилмаган қарорни эълон қилди: бош мураббий Арне Слот ўз лавозимидан озод этилди. Мавсум якунлари бироз кўнгилдагидек чиқмаган бўлса-да, клуб раҳбарияти аввалроқ нидерландиялик мутахассис келгуси мавсумда ҳам жамоани бошқаришини таъкидлаган эди. Бироқ сўнгги натижалар раҳбариятни фикридан қайтишга мажбур қилди. Бу ҳақда Goal.com хабар беради.
Fabrizio Romano берган маълумотларга кўра, эндиликда Ливерпул бош мураббийлиги учун асосий номзод Андони Ираола бўлиб турибди. Қизиғи шундаки, Ираола айни дамда Бавария ва бошқа топ-клублар қатори Баер Леверкусеннинг ҳам қизиқишлар доирасига тушган эди. Унинг АФК Боурнемоут билан шартномаси якунига етмоқда ва у сўнгги йилларда кўрсатган натижалари билан кўплаб грандлар эътиборини тортди.
"Бу клуб учун жуда қийин қарор бўлди," — дейилади Энфилд клуби баёнотида. "Арне Слотнинг Ливерпул ривожига қўшган ҳиссаси беқиёс ва муваффақиятли бўлди. У эришган ютуқлар учун миннатдорчилигимиз чексиз." Эслатиб ўтамиз, Слот ўзининг дебют мавсумидаёқ Жюрген Клоппдан кейинги оғир меросни қабул қилиб, жамоани чемпионликка етаклаган эди.
Ўтган трансфер ойнасида клуб Флориан Виртс, Александер Исак ва Жеремие Фримпонг каби юлдузлар учун қарийб 500 миллион евро сарфлаганига қарамай, жамоавий ўйин кутилган даражада шаклланмади. Ливерпул Англия Премер-лигаси мавсумини бешинчи ўринда якунлади ва Чемпионлар лигаси чорак финалида Пари Сен-Жермен жамоасига имкониятни бой берди.
Шунингдек, жамоанинг ички кубоклардаги иштироки ҳам омадсиз кечди. Англия кубоги чорак финалида Манчестер Сити жамоасидан қабул қилинган 4:0 ҳисобидаги мағлубият ва Лига кубогидаги муваффақиятсизликлар Слотнинг кетишини тезлаштирди. Эндиликда мерсисайдликлар янги даврни бошлаш арафасида турибди.
“Zamin”ни Telegram'да ўқинг!
