“Арсенал” бош мураббийи Микел Артета Чемпионлар лигаси финали олдидан “ПСЖ” устози Луис Энрике ҳақида илиқ фикрлар билдирди. Испаниялик мутахассис ҳал қилувчи баҳсда рақиб бўладиган ҳамкасбини ўзи учун илҳом манбаи бўлган шахслардан бири сифатида таърифлади.
Артетанинг айтишича, Луис Энрике футболчи сифатида ҳам ўзига хос услубга эга бўлган. У майдондаги ҳаракати, характери ва етакчилик фазилатлари билан бошқалардан ажралиб турган. “Арсенал” устози футболчи бўлган пайтларида Энрикега ўхшашга, ундан ўрнак олишга ҳаракат қилганини яширмади.
“Агар у босиб ўтган йўлни кўриб чиқсангиз, нималарга эришганини кўриб, ҳайратланишингиз аниқ. У мен учун илҳом манбаи эди. Футболчи бўлган пайтларимдаёқ унга ўхшашга ҳаракат қилардим”, — деди Артета.
Микел Артета Луис Энрикенинг мураббийлик фаолиятини ҳам юқори баҳолади. Унинг фикрича, Энрике Испанияда ҳам, хорижда ҳам ўз услубини намойиш эта олган, турли шароитларда муваффақият қозонган ва ҳар бир жамоасида ўз изини қолдирган мутахассис ҳисобланади.
“Унинг мураббийлик фаолияти ҳам ўта муваффақиятли бўлмоқда. У Испаниядан кетиб, хорижда ишлади, қайтиб келиб муваффақиятларга эришди, кейин ‘ПСЖ’. Унинг изини ҳамма ерда кўриш мумкин”, — дея таъкидлади “Арсенал” бош мураббийи.
Эслатиб ўтамиз, УЕФА Чемпионлар лигаси финали 30 май куни Венгрия пойтахти Будапештдаги “Пушкаш Арена”да бўлиб ўтади. Ҳал қилувчи учрашувда “ПСЖ” ва “Арсенал” бош соврин учун майдонга тушади.
Қисқаси, Микел Артета финал олдидан Луис Энрикега катта ҳурмат билдириб, уни ўз фаолиятида илҳом берган мутахассислардан бири деб атади. Аммо финалда ҳурмат алоҳида, рақобат алоҳида — майдонда икки испаниялик мураббийнинг ғоялари тўқнашади.
“Zamin”ни Telegram'да ўқинг!
