Хосе Моуриньо кутилмаган қарор билан Реал Мадрид бош мураббийлигига қайтмоқда. 63 ёшли португалиялик мутахассис Испания гранди билан 2029-йил июнига қадар амал қиладиган уч йиллик шартномага имзо чекди. Клуб президенти Флорентино Перез кетма-кет икки мавсумни совринсиз якунлаган жамоани қайта тиклаш учун айнан Моуриньони танлади. Бу ҳақда Goal.com хабар беради.
The Athletic нашри хабарига кўра, Реал Мадрид 8-май куни музокараларни бошлаган ва ўтган ҳафтада барча шартлар келишиб олинган. Собиқ Челси ва Манчестер Юнайтед устози Мадридга қайтиш учун Бенфика таклиф қилган янги шартномани рад этди. Флорентино Перез 7-июн куни клубда президентлик сайловларини ўтказишини эъло қилган бўлиб, Моуриньонинг тайинлови ушбу овоз бериш жараёнидан сўнг расман эълон қилиниши кутилмоқда.
Моуриньо Лиссабон клубидаги фаолиятини 16-май куни Эсторил устидан қозонилган 3:1 ҳисобидаги ғалаба билан якунлади. Бенфика раҳбарияти унинг кетишини билгач, Рубен Аморим рад жавобини берганидан сўнг, Фулхэм устози Марко Силва номзодини кўриб чиқмоқда. Реал Мадрид эса январда Хаби Алонсо истеъфога чиқарилгани ва вақтинчалик мураббий Альваро Арбелоа кетганидан сўнг оғир инқирозни бошдан кечирмоқда.
Перезнинг фикрича, Моуриньонинг қатъиятли характери кийиниш хонасидаги низоларга барҳам бериш ва ички чемпионатдаги пасайишни тўхтатиш учун айни муддаодир. Бироқ янги мураббийни қийин вазифалар кутмоқда: у норози мухлислар, Килиан Мбаппе атрофидаги гап-сўзлар ва Винисиус Жуниор билан боғлиқ ўтмишдаги зиддиятларни бартараф этиши, шунингдек, ёзги трансферлар кампаниясини муваффақиятли ўтказиши лозим.
“Zamin”ни Telegram'да ўқинг!
