Jose Mourinho kutilmagan qaror bilan Real Madrid bosh murabbiyligiga qaytmoqda. 63 yoshli portugaliyalik mutaxassis Ispaniya grandi bilan 2029-yil iyuniga qadar amal qiladigan uch yillik shartnomaga imzo chekdi. Klub prezidenti Florentino Perez ketma-ket ikki mavsumni sovrinsiz yakunlagan jamoani qayta tiklash uchun aynan Mourinhoni tanladi. Bu haqda Goal.com xabar beradi.
The Athletic nashri xabariga koʻra, Real Madrid 8-may kuni muzokaralarni boshlagan va oʻtgan haftada barcha shartlar kelishib olingan. Sobiq Chelsi va Manchester Yunayted ustozi Madridga qaytish uchun Benfika taklif qilgan yangi shartnomani rad etdi. Florentino Perez 7-iyun kuni klubda prezidentlik saylovlarini oʻtkazishini eʻlo qilgan boʻlib, Mourinhoning tayinlovi ushbu ovoz berish jarayonidan soʻng rasman eʻlon qilinishi kutilmoqda.
Mourinho Lissabon klubidagi faoliyatini 16-may kuni Estoril ustidan qozonilgan 3:1 hisobidagi gʻalaba bilan yakunladi. Benfika rahbariyati uning ketishini bilgach, Ruben Amorim rad javobini berganidan soʻng, Fulxem ustozi Marko Silva nomzodini koʻrib chiqmoqda. Real Madrid esa yanvarda Xabi Alonso isteʻfoga chiqarilgani va vaqtinchalik murabbiy Alvaro Arbeloa ketganidan soʻng ogʻir inqirozni boshdan kechirmoqda.
Perezning fikricha, Mourinhoning qatʻiyatli xarakteri kiyinish xonasidagi nizolarga barham berish va ichki chempionatdagi pasayishni toʻxtatish uchun ayni muddaodir. Biroq yangi murabbiyni qiyin vazifalar kutmoqda: u norozi muxlislar, Kylian Mbappe atrofidagi gap-soʻzlar va Vinicius Junior bilan bogʻliq oʻtmishdagi ziddiyatlarni bartaraf etishi, shuningdek, yozgi transferlar kampaniyasini muvaffaqiyatli oʻtkazishi lozim.
“Zamin”ni Telegramʻda oʻqing!
