Neuralink бутун дунё бўйлаб янги беморлар қидиришни бошлади

Миллиардер Илон Маскнинг Neuralink стартапи навбатдаги операциялар учун янги беморларни қидиришга киришди. Энди бу борада минтақавий чегаралар йўқ — дунёнинг исталган нуқтасидаги вояга етган шахс навбатдаги иштирокчига айланиши мумкин. Олдин аризалар фақат АҚШ, Канада ва Буюк Британия аҳолисидан қабул қилинарди.

Neuralink’нинг дастлабки беморлари фалаж ёки ён амиотрофик склерози бўлган одамлар эди, эндиликда янги касаллиги бор кўнгиллилар қидирилмоқда. Компания тетраплегияга (тананинг асосий қисми фалажланган) чалинган инсонларни қидираётганини маълум қилди. Мажбурий шарт: беморнинг орқа мия жароҳати сабаб иккала қўли ҳам ишламаслиги керак.

Аризаларни 2025 йил 2 апрелдан бошлаб лабораториянинг расмий сайти орқали юбориш мумкин.

Тажриба доирасида чип бош чаноғига жойлаштирилади. Махсус манипулятор робот ёрдамида 64 та ингичка тола киритилади, уларда жами 1024 та электрод мавжуд. Манипулятор робот миянинг ҳаракатга жавоб берадиган соҳаларини бирлаштиради. Ҳар бир толанинг қалинлиги 4 микрометрдан, узунлиги эса 20 миллиметрдан ошмайди. Чипнинг ўзини катталиги эса тангадек келади.

«Тадқиқот ҳаракатлар учун жавобгар бўлган мия қисмига кичик, ташқи томондан кўзга ташланмайдиган имплант жойлаштиришни ўз ичига олади. Ушбу қурилма инсоннинг нейрон фаоллигини таҳлил қилиб, унга фақат ҳаракат ҳақида ўйлаш орқали компютер ёки смартфонни бошқариш имкониятини беради. Бунда ҳеч қандай симлар ёки жисмоний ҳаракат талаб этилмайди», — дейилади хабарда.

Эслатиб ўтамиз, 2024 йил январ ойида дунёдаги биринчи одамга Neuralink мия импланти ўрнатилганди. 29 ёшли Ноланд Арбо умуртқа поғонаси шикастланган бахтсиз ҳодиса оқибатида бутунлай фалаж бўлиб қолган. Арбо миясига Neuralink чипининг ўрнатилиши натижасида фикр кучи ёрдамида компютерни бошқара олган. “Замин” янгиликларини “Telegram”да кузатиб боринг