"Аталанта" бош мураббийи Иван Юрич ўз шогирдларининг имкониятлардан унумли фойдалана олмаганидан норози бўлди. 22 октябрь куни кечқурун жамоа Чемпионлар лигаси доирасида Праганинг "Славия" клубига қарши майдонга тушиб, 0:0 ҳисобида дуранг ўйнади.
Учрашув давомида италиялик футболчилар 52 та ҳужум уюштириб, 21 марта дарвоза томон зарба йўллади. Шунга қарамай, Лукман, Крстович ва Скамакка каби ҳужумчилар ҳам ҳисобни очишга муваффақ бўлмади. Иван Юрич сўнгги икки ўйинда жамоа 15 та аниқ гол уриш учун имконият яратганини таъкидлади.
У бош билан зарба, қарши ҳужум ва оддий зарбалар бўлганини айтди. Юрич футболчилар, мухлислар ва клуб учун натижадан ранжиганини билдирди.
Унинг сўзларига кўра, жамоа юқори савияда ўйин кўрсатаётгани билан, сўнгги босқичда натижа бўлмаяпти. Ушбу дурангдан сўнг "Аталанта" 4 очко билан турнир жадвалида ўн еттинчи ўринда бормоқда.
