Италия Миллий астрофизика институти (ИНАФ) олимлари Пиеро ди Мартино ва Алессандро Мура бошчилигидаги тадқиқот гуруҳи NASAнинг Juno космик станцияси юборган маълумотлар асосида Ио йўлдошидаги вулқон фаолиятини таҳлил қилди. Тадқиқот натижалари Қуёш тизимидаги энг фаол вулқон танаси ҳисобланган Ио бўйича узоқ йиллардан буён давом этиб келаётган «энергетик парадокс»ни ҳал қилишга имкон берди. Бу ҳақда Ixbt.com хабар беради.
Олимлар аввалги ҳисоб-китоблар нотўғри бўлганини аниқлашди. Илгари телескоплар ва Галилео аппарати фақат юқори ҳароратли вулқон ҳалқаларини қайд этган, бироқ Juno спектрометри ёрдамида лава кўлларининг марказий, нисбатан «совуқ» қисмлари ҳам улкан энергия тарқатиши маълум бўлди. Айнан шу ҳудудлар йўлдошнинг умумий иссиқлик балансида асосий ўринни эгаллайди.
Тадқиқот давомида Аматерасу ва Хорс каби лава кўлларининг ҳарорат режими ўрганилди. Математик моделлаштириш натижаларига кўра, ушбу кўллардаги лава қобиғининг ёши бир неча ойдан 10 йилгача давом этади. Бу эса Ио ички қисмларидаги магманинг ёпишқоқлиги ва унинг совиш жараёнлари ҳақида янги маълумотларни тақдим этди.
Ушбу кашфиёт Юпитер ва Европа тортишиш кучлари таъсирида ҳосил бўладиган энергия қаерга сарфланиши ҳақидаги саволга жавоб беради. Маълум бўлишича, айнан эски ва нисбатан совуқ лава кўллари йўлдошнинг асосий «энергетик клапанлари» вазифасини бажариб, ер ости иссиқлигини самарали тарзда ташқи муҳитга чиқариб юборади.
“Zamin”ни Telegram'да ўқинг!
