Манчестер Сити вингери Жеремй Доку жорий мавсумдаги самарали ўйини унинг услуби ўзгаргани билан боғлиқ эмаслигини таъкидлади. Белгиялик футболчи Брентфорд дарвозасига киритган голидан сўнг, ўзининг майдондаги ҳаракатлари ҳамон инстинктга асосланганини маълум қилди. Бу ҳақда Goal.com хабар беради.
Пеп Гуардиола шогирдлари Брентфордга қарши баҳсда 3:0 ҳисобида ғалаба қозониб, Англия Премер-лигаси пешқадами Арсенал билан орадаги фарқни икки очкогача қисқартирди. Учрашувда ҳисобни очган Доку рақиб ҳимоясини ёриб ўтишда асосий фигура бўлди.
Ўйин якунида ББК нашрига берган интервюсида Доку шундай деди: "Мен инстинктга таяниб ўйнайдиган футболчиман. Ҳозирча ҳаммаси яхши кетмоқда ва голлар киритмоқдаман. Ўйин услубимни ўзгартирганим йўқ, шунчаки аввалги ҳаракатларим эндиликда самарали якунланмоқда".
Доку, шунингдек, жамоадоши Омар Мармоушнинг гол урганидан хурсанд эканини билдириб, унинг машғулотлардаги меҳнаткашлигини алоҳида қайд этди. Эрлинг Холанд ва Мармоушнинг голлари Манчестер Сити учун муҳим ғалабани таъминлади.
“Zamin”ни Telegram'да ўқинг!
