Корея электротехника институти тадқиқотчилари қаттиқ жисмли аккумуляторлар бозорга чиқишини тезлаштирувчи янги технологияни ишлаб чиқди. Улар электродлар ва қаттиқ электролит ўртасидаги алоқани яхшилаш учун наноолчамдаги қалай қатламидан фойдаланишни таклиф қилди. Бу ҳақда Ixbt.com хабар беради.
Бу ички йўқотишларни камайтиради ва литий анодининг барқарор ишлашига ёрдам беради.
Янги ишланманинг асосий афзаллиги шундаки, бундай батареялар 2 МПа атрофидаги нисбатан паст босимда ҳам самарали ишлай олади. Одатда қаттиқ жисмли аккумуляторлар юқори босим ва мураккаб конструкцияларни талаб қилади.
Бу эса уларнинг массаси, ўлчамлари ва нархини ошириб юборади.
Синовлар давомида бундай оралиқ қатламга эга ҳужайралар 350 Вт·соат/кг дан ортиқ энергия сиғимини кўрсатди. Бу оддий литий-ионли аккумуляторларга қараганда анча юқори кўрсаткич ҳисобланади.
Шунингдек, 500 марта зарядлаш ва зарядсизлантириш циклидан сўнг батареялар ўз сиғимининг 81 фоизидан кўпроғини сақлаб қолди.
Технология материаллар чегарасидаги қаршиликни камайтириш ва литий дендритлари ўсишини бостириш ҳисобига ишлайди. Наноолчамдаги қалай қатлами ионлар ҳаракати учун қўшимча йўл яратади ва литийни парчаланишдан ҳимоя қилади.
Муаллифларнинг фикрича, ушбу технология электромобиллар, робототехника ва энергия сақлаш тизимларида қўлланилиши мумкин.
“Zamin”ни Telegram'да ўқинг!
