Амстердамда робот қайиқларни синовдан ўтказиш бошланди

^{Фото: Screen Rant}
Нидерландия пойтахти Амстердамда Roboats (робот қайиқлар) деб номланган автоном электр кемаларни синовдан ўтказиш бошланди. Бу ҳақда Screen Rant хабар берди.

Модульли конструкция туфайли робот қайиқлар ўзгартирилиши ва турли вазифаларга мослаштирилиши мумкин. Роботлар юк ёки йўловчиларни ташийди, йўл давомида чиқиндиларни йиғади ва ҳатто бир-бирига уланиб, сузувчи инфратузилма, масалан, доклар ёки кўприклар ҳосил қилади.

^{Фото: Screen Rant}
Қайиқнинг ички таянч қисми аккумуляторли электр платформага, ҳаракатга келтириш ва бошқариш, реал вақт режимида сувни таҳлил қилиш тизимларига асосланган. 360 градусли кўриш бурчагига эга камералар ва лидарлар сувда ҳаракатни бошқаришга ёрдам беради — бу худди ҳайдовчисиз транспорт воситаларига ўхшаб кетади.

Платформанинг юқори қисмини алмаштириш мумкин. Йўловчи модули ўриндиқлар билан жиҳозланган ва 5-6 кишини сиғдира олади. Бир қувватлашда роботлар тахминан 10 соат ишлайди, уларни симсиз зарядлаш ҳам мумкин.

Лойиҳа Массачусетс технология институти компьютер фанлари ва сунъий интеллект лабораторияси (CSAIL) томонидан Амстердам илғор шаҳар ечимлари институти (АМС) билан ҳамкорликда ишлаб чиқилган. Профессор Карло Раттининг сўзларига кўра, қурилмалар ҳали синов босқичида, бироқ ташкилот аллақачон уларни тижорий мақсадларида ишга туширишни режалаштирган.

«Айни пайтда бу ҳали прототип. Бошқариш сенсорли интерфейс ёрдамида амалга оширилади. Сиз шунчаки манзилингизни кўрсатасиз ва қайиқ сизни у ерга олиб боради», — дейди профессор. “Замин” янгиликларини “Одноклассники”да кузатиб боринг