Apple компанияси арзонроқ нархдаги MacBook ишлаб чиқармоқда. Бу ҳақда Bloomberg ахборот агентлиги хабар берди.
Ички код номи J700 бўлган ушбу қурилма кенг фойдаланувчилар аудиторияси учун мўлжалланган бўлиб, оддий вазифаларни бажаришга қаратилган. У интернет саҳифаларини кўриш, офис ҳужжатлари билан ишлаш, оддий мультимедиа таҳрирлаш ва бошқа катта ресурс талаб қилмайдиган вазифалар учун идеал танлов бўлади.
Инсайдерларнинг маълумотларига кўра, қурилма фаол синов босқичида бўлиб, хорижий етказиб берувчилар томонидан дастлабки ишлаб чиқариш босқичига ўтган. Apple ушбу арзонроқ MacBook’ни 2026 йилнинг биринчи ярмида чиқаришни режалаштирмоқда.
Нархни пасайтириш ва агрессив нарх сиёсатиини амалга ошириш мақсадида Apple ўзининг аввалги MacBook моделларида қўлланилмаган бир қатор муҳандислик ечимларини жорий қилади. Bloomberg аналитиги Марк Гурманнинг таъкидлашича, қурилма нисбатан арзонроқ компонентлар, жумладан, юқори сифатли моделларга нисбатан пастроқ LCD дисплей билан жиҳозланади.
Ушбу MacBook’нинг экрани ҳозирги MacBook Air’нинг 13,6 дюймли экранидан кичикроқ бўлади. Муҳим жиҳат шундаки, қурилма учун iPhone учун ишлаб чиқилган процессор (эҳтимол, A18 Pro чипи) ишлатилади.
Бу Macbook тарихида илк бор махсус Mac компьютерлари учун мўлжалланган M сериясидаги чип ўрнига мобил процессор қўлланишини англатади. Bloomberg’нинг қайд этишича, ички синовлар iPhone чипи бир неча йил аввал MacBook’ларда ишлатилган M1 чипига қараганда яхшироқ ишлашини кўрсатган.
Apple илгари iPad учун iPhone чипларини қўллаган, аммо кейинчалик юқори даражадаги моделларда M сериясидаги процессорларга ўтган эди. Янги MacBook’нинг нархи минг доллардан сезиларли даражада арзон бўлиши кутилмоқда.
Қурилма тахминан 600 доллар атрофида бўлади ва бу уни Magic Keyboard Folio клавиатурасига эга юқори сифатли iPad планшетлари, шунингдек, ChromeOS тизимида ишлайдиган арзон ноутбуклар (Chromebook) билан рақобатлашишга имкон беради. Тарихий жиҳатдан Apple доимо юқори фойда маржаси билан премиум сегментга эътибор қаратган.
J700 модели билан арзонроқ ноутбуклар бозорига кириш компания учун янги қадам бўлади.
