Жигарни асраш санъати: ушбу 10 та маҳсулот билан соғлом ҳаётга қадам

Организмдаги энг муҳим аъзолардан бири – жигар ҳаёт сифати учун беқиёс аҳамиятга эга. У қонни зарарли моддалардан тозалаш, витамин ва минераллар захирасини сақлаш, яллиғланишни назорат қилиш ва энергия ишлаб чиқариш каби вазифаларни бажаради. Шунинг учун ҳам, уни тўғри парваришлаш ва мустаҳкам ҳимоя қилиш ҳар бир инсон учун асосий шарт, деб таъкидлайди Соғлиқни сақлаш вазирлиги.

Жигарни ҳимоя қилиш ва унга ортча юк тушмаслиги учун қайси маҳсулотларни танлаш керак? Мутасаддилар ана шу саволга жавоб сифатида эътиборли 10 та маҳсулотни алоҳида таъкидлашди. Ҳар бирига тўхталамиз.

Қовоқ — антиоксидант куч ва минераллар манбаи
Қовоқ бета-каротинга ва муҳим антиоксидантларга бой бўлиб, жигар ҳужайраларини зарарли моддалардан ҳимоя қилади. Таркибидаги С, Е, калий, магний ва темир витаминлари жигар фаолиятини рағбатлантиради, ҳимоя механизмларини мустаҳкамлайди. Мазкур маҳсулотдаги сув ва толалар эса организмдан шлак ва токсинларни чиқаришни тезлаштиради.

Туршак — табиий ҳимоячи
Туршак таркибидаги силимарин моддаси детоксикация қобилиятини кучайтиради, жигарни фаол ҳимоялайди. Фаолиятни тиклаш ва организмдаги оғир моддаларни безарарлаштиришда муҳим ўрин тутувчи маҳсулотлардан бири.

Сут маҳсулотлари — микрофлора ва детокс кучи
Йогурт, қатиқ ва бошқа сут маҳсулотларидаги пробиотиклар ичак микрофлорасини яхшилаб, ҳазм тизимини мувозанатга келтиради. Бу эса жигарга тушадиган зарарли моддалар юкини камайтиради.

Брокколи — табиий антиоксидантлар ва саратонга қарши ҳимоя
Сульфорафан, дииндолилметан ва глюкорафанин каби бирикмаларга бой брокколи нафақат яллиғланишни секинлаштиради, балки саратонга қарши табиий ҳимоя функциясини ҳам оширади. Шунингдек, детокс жараёнини қўллаб-қувватлайди.

Зайтун ёғи — ҳужайраларни қувватлантиради
Зайтун ёғидаги олеин кислотаси жигар ҳужайраларини эркин радикаллардан асраб, яллиғланиш хавфини пасайтиради. Мазкур ёғ “ёмон” холестеринни камайтиради, “яхши” холестеринни оширади.

Ёғли балиқлар — омега-3 ва протеин манбаи
Ёғли балиқлардаги омега-3 ёғ кислоталари, Д ва В12 витаминлари, селен ва йод жигар тўқималарини тиклашда муҳим роль ўйнайди. Ушбу маҳсулот сифатли протеин манбаи бўлиб, ҳужайраларни янгилайди.

Қизил лавлаги — табиий детокс ва қувват
Қизил лавлагининг бетанин моддаси жигар фаолиятини яхшилайди, детоксикация қобилиятини оширади, яллиғланишга қарши курашади.

Ёнғоқлар — Е витамини ва омега-3
Бодом ва ёнғоқлар антиоксидантларга ва омега-3 ёғ кислоталарига бой. Улар яллиғланишни камайтиради, ҳужайраларни фаол ҳимоялайди.

Тарвуз — енгил қанд ва сув баланси
Организмдан ортиқча суюқлик ва шлакларни чиқаришда тарвуз етарлича самарали. Ундаги енгил ўзлаштириладиган қандлар жигар тўқималари учун қўшимча энергия манбаи бўлади.

Сули ёрмаси — тола ва ҳазм тизимига ёрдам
Юқори толали сули ёрмаси ҳазм қилишни рағбатлантириб, токсинларни организмдан чиқаришга ёрдам беради, жигар фаолиятини енгиллаштиради.

Якуний сўз: жигарни ҳимоя қилиш учун парҳезда айнан мана шу маҳсулотларга ўрин бериш, турли витамин ва минераллар балансига эътибор қаратиш ҳар бир инсон учун муҳим. Тўғри овқатланиш ва мунтазам парвариш – соғлом ҳаёт учун асосий қадам! «Замин»ни Telegram’да ўқинг!