Тайванлик олимлар соч тўкилишига қарши табиий суюқ дори ишлаб чиқишди. Тажриба ҳайвонлар устида синовдан ўтказилган — атиги 20 кун ичида тўлиқ кал бўлиб қолган хомякларда соч ва туклар қайта ўса бошлаган.
Тадқиқотчиларнинг айтишича, бу суюқлик таркибидаги ёғ кислоталари соч илдизларини фаоллаштиради, қон айланишини яхшилайди ва терини безовта қилмайди. Энг муҳими, у сунъий кимёвий моддаларни ўз ичига олмайди, шу боис хавфсиз восита сифатида баҳоланмоқда.
Тажриба натижалари олимларнинг ўзларини ҳам ҳайратга солган. Уларнинг фикрича, бу дори соч тўкилишига қарши табиий ечим излаётганлар учун янги умид бўлиши мумкин.
Яқин кунларда ушбу восита инсонлар устида ҳам клиник синовлардан ўтказилади. Агар натижа худди шундай ижобий бўлса, бу калликка қарши кураш тарихида энг муҳим ютуқлардан бири сифатида қайд этилади.
Экспертлар соч тўкилиши муаммоси дунё бўйича миллионлаб одамларни қийнаётганини, айниқса стресс ва генетик омиллар сабабли ёшлар орасида ҳам бу ҳолат кенг тарқалаётганини таъкидлашмоқда. Шунинг учун, янги дори соғлом ва табиий тикланиш механизмини ишга тушириши билан ажралиб туради.
Олимларнинг ўзи бу ютуқни “табиат ва технология уйғунлигининг исботи” деб аташди. Уларнинг фикрича, бу тадқиқот инсон танасининг ўзини тиклаш салоҳиятини янада чуқурроқ ўрганишга йўл очади.
