Иситма – тананинг касалликка қарши табиий ҳимоя белгиси. Одатда у вирус ёки бактериялар танага кирганда пайдо бўлади. Тана ҳарорати кўтарилганда, бу микроблар учун ноқулай муҳит яратилади ва улар тез кўпаёлмайди. Шу сабабли енгил иситма тананинг ўзини ҳимоя қилиш усули ҳисобланади.
Қадимда одамлар иситмани алоҳида касаллик деб билган. Улар уни қон олиш ёки оч қолиш орқали даволашга уринган. Машҳур олим Луи Пастер микроблар назариясини кашф этгандан сўнг, иситма аслида касаллик эмас, балки организмнинг инфекцияга жавоби экани аниқланган.
Шифокорларнинг айтишича, тана ҳарорати 38 даражадан ошса, бу иситма ҳисобланади. Енгил иситмада тана ўз ҳолича касалликка қарши кураша олади. Аммо ҳарорат 40 даражадан ошса, бу хавфли бўлиши мумкин. Бундай ҳолатда сувсизланиш, ҳушдан кетиш ёки талваса юз бериши эҳтимоли бор.
Иситма кўпинча болаларда учрайди, чунки уларнинг тана ҳарорати бошқарув тизими ҳали тўлиқ шаклланмаган бўлади. Шу сабабли, ҳарорат тез кўтарилиб, тез пасайиши мумкин. Аммо ҳар қандай ҳолатда ҳам иситма узоқ давом этса ёки оғриқ, йўтал, ҳолсизлик билан кечса, шифокорга мурожаат қилиш керак.
Мутахассислар тавсия қилади: енгил иситмани ҳар доим тушириш шарт эмас. Тана касалликка қарши табиий курашсин. Лекин ҳолат оғирлашса, дарҳол тиббий ёрдамга мурожаат қилиш лозим. Чунки ўз-ўзидан даволаниш айрим ҳолларда соғлиқ учун хавф туғдиради.
