Ukrainada urushning 486-kuni: Rossiyadagi bir kunlik isyon va Ukrainadagi qarshi hujum (foto)

Ukrainada urushning 486-kuni o‘tdi. Asosiy ma’lumotlar:

• 24 iyun kuni «Vagner» XHK jangchilari milliondan ortiq kishi yashaydigan Rostov-Donni nazoratiga oldi va Moskva tomon yo‘l oldi. Bu voqea Yevgeniy Prigojin e’lon qilgan «Adolat marshi» doirasida ro‘y berdi. 
• Vladimir Putin murojaat bilan chiqib, Prigojinni xiyonatda aybladi — shu bilan birga «Vagner» rahbarining nomini tilga olmadi.
• RF Bosh prokuraturasi RF JK 279-moddasi (qurolli isyon) bo‘yicha Prigojinga qarshi jinoiy ish ochdi — bu modda 12 yildan 20 yilgacha ozodlikdan mahrum etish jazosini ko‘zda tutadi.
• Moskva shahrida, shuningdek Moskva va Voronej oblastlarida aksilterror amaliyotlar rejimi joriy etildi. U hukumatga keng vakolatlar taqdim etadi: kuchishlatar idoralar sud qarorisiz regionlar aholisining shaxsiy yozishmalarini o‘qish va istalgan binoga kirishi mumkin.
• «Vagner» jangchilari Moskvaga yetishiga 200 kilometr qolganida Prigojin shunday dedi: «Qon to‘kilmasligi uchun o‘z kolonnalarimizni ortga buramiz va reja bo‘yicha dala lagerlariga qaytamiz». Bu uning Aleksandr Lukashenko bilan o‘tkazilgan muzokarasi natijasida ro‘y berdi.
• RF prezidenti matbuot kotibi Dmitriy Peskovga ko‘ra, Prigojinga qarshi ochilgan jinoiy ish to‘xtatiladi, u Belarusga «ketadi», isyonda qatnashgan «Vagner» yollanma jangchilari esa «frontdagi xizmatlari inobatga olingan holda» qonun tomonidan ta’qib qilinmaydi.
• Oryx loyihasi ma’lumotlariga ko‘ra, rossiyalik harbiylar «Vagner» XHK bilan qurolli nizo vaqtida uch vertolyot va bir samolyot yo‘qotgan. Rossiyalik harbiylashgan va propagandachi kanallarning RF mudofaa vazirligi yo‘qotishlari to‘g‘risidagi ma’lumotlari bir-biridan farq qiladi — ayrim ma’lumotlarga ko‘ra olti vertolyot va bir samolyot urib tushirilgani, kamida 13 nafar uchuvchi halok bo‘lgani aytiladi. Yo‘qotishlar bo‘yicha hozircha rasman ma’lumot berilmagan.
• Moskva meri Sergey Sobyanin 26 iyun, dushanba kunini ishlanmaydigan kun deb e’lon qilgan. Moskva oblastida ommaviy tadbirlar 1 iyulga qadar bekor qilingan. «Aksilterror operatsiyalar rejimi» poytaxtda ham, xuddiy Moskva va Voronej oblastlarida bo‘lgani kabi saqlanib qoladi.

Kiyev bo‘ylab raketa zarbasi

24 iyunga o‘tar kechasi Rossiya Kiyevga X-101/X-555 qanotli raketalari bilan hujum qildi — Kiyev harbiy ma’muriyati xabariga ko‘ra, 20 dan ortiq raketalar havo hujumidan mudofaa kuchlari tomonidan urib tushirilgan. Shaharning Solomensk rayonida raketa parchalari 25 qavatli turar joy binosiga tushgan, vayrongarchilik va binoning bir necha qavatlarida yong‘in ro‘y bergan. Yong‘inni tongga kelib o‘chirishga muvaffaq bo‘lishgan. Mahalliy harbiy ma’muriyatga ko‘ra, hujum oqibatida besh kishi halok bo‘lgan, 14 kishi yaralangan, shundan to‘rt nafari shifoxonaga yotqizilgan.

Zaporijjya oblastidagi ukrainalik minomyotchilar

Yevgeniy Prigojin qurolli isyon uchun sabablardan biri sifatida Rossiya armiyasining Ukrainadagi yo‘qotishlarini — jumladan, Zaporijjya oblastidagi vaziyatni keltirgandi. 24 iyun kuni holatiga ko‘ra, ukrain qo‘shini intensiv janglar natijasida Zaporijjyadan janubdagi Pyatixatki qishlog‘ini ozod etgan va Rossiya armiyasining tayanch punkti joylashgan Rabotino posyolkasi tomon harakatlangan. Qarshi hujum boshlanganidan buyon ukrain qo‘shini uch kilometr oldinga siljigan. Ammo vaziyat Rossiya qurolli kuchlari uchun og‘ir darajada emas — bu uchastkada mudofaa yaxshi mustahkamlangan.

Ukrainalik askarning dafn marosimi 

«Vagner» isyoni

«Vagner» XHK rahbari Yevgeniy Prigojin 23 iyun kuni e’lon qilgan «Adolat marshi» qanchalik kutilmagan tarzda boshlangan bo‘lsa, shunday kutilmaganda tugadi. 24 iyun tongida uning yollanma jangchilari front yaqinidagi Rostov-Don shahrini egallashgandi. Shahar aholisining bir qismi markazda yig‘ilib, formadagi kishilar va harbiy texnikalar bilan suratga tushayotganida, boshqalar shaharni tark etishga urindi. «Vagner» jangchilari Rostovdan Moskvaga yo‘l oldi — Voronej va Lipetsk oblastlari orqali. Vagnerchilarning «marshi» vaqtida Voronej shahri yaqinida neft bazasida yong‘in chiqdi (o‘t olish sabablari haqida xabar qilinmagan, ayrim ma’lumotlarga ko‘ra, yong‘indan oldin baza ustidan harbiy vertolyot uchib o‘tgandi). Yong‘in faqat 12 soat o‘tganidan keyin o‘chirildi.

Prigojin mudofaa vaziri Sergey Shoygu va Bosh shtab boshlig‘i Valeriy Gerasimovni jangchilariga topshirishni talab qildi. Unga qarshi qurolli isyon (RF JKning 279-moddasi) bo‘yicha jinoiy ish ochildi. Ammo «Vagner» kuchlari Moskvadan 200 kilometr masofada turganida, Prigojin uning jangchilari «rejaga ko‘ra dala lagerlari yo‘nalishida ortga qaytishi»ni e’lon qildi. Bu Vladimir Putin roziligi bilan Aleksandr Lukashenko Prigojin bilan muzokara o‘tkazishi ortidan ro‘y berdi.

Rossiya prezidenti matbuot kotibi Dmitriy Peskov Prigojinga qarshi jinoiy ish to‘xtatilishi, u Belarusga «ketishi» (nima uchunligi — noma’lum), isyonda ishtirok etgan yollanma jangchilar esa ta’qib qilinmasligi haqida aytdi. Bundan tashqari, ular RF mudofaa vazirligi bilan shartnoma tuzishi mumkinligi qo‘shimcha qilindi. Isyon vaqtida Moskva shahri, Moskva va Voronej oblastlarida joriy etilgan «aksilterror amaliyot» rejimi amalda qoldi.

Manba: Kun.uz

Шухрат Раззаков

«ZAMIN.UZ» muharriri

Mavzuga oid yangiliklar

Tramp: «Zelenskiyning Qrim haqidagi bayonotlari mojaroni yanada keskinlashtirmoqda»

Kecha, 23:51

Trampning “oxirgi taklifi” nima va u qanday mojaroga aylandi?

Kecha, 23:11

Qirg‘izistonda Rus uyi xodimi yollanma askar yollashda gumonlanib hibsga olindi

Kecha, 22:52

Shimoliy Kipr va turkiy birlik: ziddiyat emas, tadrijiylik

Kecha, 20:47

Turkiyada sodir bo‘lgan kuchli zilzila sabab 151 kishi binolardan sakragan

Kecha, 19:24

Orzu yo‘lida har kuni samolyotda uchgan xonanda Yudzuki Nakasima: «Qiyinchiliklar orzularimizning qiymatini oshiradi»

Kecha, 18:52