Janubiy Koreyada hukumat noqonuniy ravishda mamlakat hududida bo‘lib turgan chet ellik fuqarolarga qarshi keng ko‘lamli tekshiruvlar kampaniyasini boshladi, deb xabar berdi KoreaHerald.com. Bu choralar Adliya vazirligi tashabbusi bilan amalga oshirilmoqda va unga politsiya, dengiz politsiyasi hamda mehnat va transport vazirliklari ham jalb etilgan.
Reydlar mamlakat bo‘ylab amalga oshirilayotgan bo‘lib, ularning asosiy maqsadi — qonuniy asosga ega bo‘lmagan migrantlarni, ish haqi va litsenziyasiz faoliyat bilan shug‘ullanayotgan shaxslarni, shuningdek vositachilar va qonunbuzar ish beruvchilarni aniqlashdir. Bu operatsiyalar 12-dekabrgacha davom etadi va ayniqsa, 2025-yilda Kyonju shahrida bo‘lib o‘tadigan APEC sammiti arafasida xavfsizlik choralarini kuchaytirishga qaratilgan.
Hukumat ma’lum qilishicha, ushbu choralar nafaqat migratsiya tizimini tozalash, balki mahalliy fuqarolarning ish o‘rinlarini muhofaza qilish maqsadini ham ko‘zlamoqda. Shu boisdan ko‘plab chet elliklar tekshiruv doirasiga tushishi mumkin. Mahalliy manbalarning ta’kidlashicha, ayrim ish beruvchilar ham noqonuniy mehnatchi jalb etganlik uchun javobgarlikka tortilishi ehtimol qilinmoqda.
Adliya vazirligi ma’lumotiga ko‘ra, qonunbuzarlik aniqlangan holatlarda jarima, mamlakatdan chiqarish (deportatsiya) va keyinchalik Janubiy Koreyaga kirishni taqiqlash kabi jazo choralari qo‘llaniladi. Biroq rasmiylar bu jarayonda inson huquqlariga to‘liq rioya qilinishiga katta ahamiyat qaratayotganini ta’kidladi.
Vazirlik vakillari migrantlarga murojaat qilib, noqonuniy maqomni ixtiyoriy ravishda bartaraf etish kelgusida jiddiy huquqiy oqibatlardan qutulish imkonini berishi mumkinligini eslatdi. Ya’ni, kimki ixtiyoriy ravishda yurtni tark etsa, keyingi safar viza olishda yoki kirishda unga nisbatan yengilliklar qo‘llanishi ehtimolsiz bo‘lmaydi.
O‘zbekiston Tashqi mehnat migratsiyasi agentligi ma’lumotlariga ko‘ra, yil boshidan buyon E-9 vizasi shartlarini buzgan 26 nafar vatandoshga nisbatan jarimalar qo‘llanilgan. Ular har bir noqonuniy bo‘lib turgan oyi uchun 2000 dollardan to‘lashga majbur bo‘lgan. Bu holat fuqarolarga chet eldagi qonun talablariga qat’iy amal qilish zarurligini yana bir bor yodga soladi.
Janubiy Koreyadagi bu operatsiya nafaqat mamlakat ichidagi tartibni ta’minlash, balki mintaqadagi xalqaro sammitlar arafasida xavfsizlikni kuchaytirish siyosati doirasida ham amalga oshirilayotgani qayd etilmoqda. Shu bois, rasmiylar migrantlarni qonuniy maqomni tiklash yoki mamlakatni tark etishga chaqirmoqda.
Shu tariqa, Janubiy Koreya hukumati migratsiya sohasida qat’iy tartib o‘rnatishga kirishdi. Mehnat bozorini sog‘lomlashtirish va qonun ustuvorligini ta’minlash bu kampaniyaning asosiy yo‘nalishi bo‘lib qolmoqda.
“Zamin”ni Telegramʻda oʻqing!
