Hafta oxiri O‘zbekistonda ob-havo biroz o‘zgaradi — “O‘zgidromet” ma’lumotlariga ko‘ra, dam olish kunlarida mamlakatning ayrim hududlarida harorat pasayishi va qisqa muddatli yomg‘irlar kuzatilishi kutilmoqda.
Sinoptiklarning xabar berishicha, 25–26-oktyabr kunlari Toshkent viloyatining tog‘li hududlarida qisqa muddatli yomg‘ir yog‘ishi mumkin. Ayrim baland tog‘li joylarda yog‘in qor ko‘rinishida bo‘lishi ehtimoldan xoli emas.
Hafta oxiridagi ob-havo sharoitida kunduzgi harorat asta-sekin pasayib boradi. 25-oktyabr kuni havo 23–28 daraja iliq bo‘lsa, 26-oktyabr kuni 21–26 daraja atrofida bo‘lishi kutilmoqda. Shimoliy viloyatlarda esa harorat nisbatan past — 19–24 daraja oralig‘ida bo‘ladi.
Poytaxt Toshkentda shanba kuni kunduzi 25–27 daraja, yakshanba kuni esa 24–26 daraja iliq havo saqlanishi prognoz qilingan. Kechasi harorat 13–15 darajagacha tushishi kutilmoqda.
Kuzning ikkinchi yarmiga xos bo‘lgan bu o‘zgarishlar yomg‘irli va biroz sovuq kunlarning boshlanishidan darak bermoqda. Sinoptiklar havo sharoitidagi keskin o‘zgarishlar bo‘lmasligini, ammo ba’zi hududlarda shamol kuchayishi mumkinligini ham istisno etmayapti.
Shu bilan, hafta oxiri mamlakat bo‘ylab salqin va nam havo hukm suradi, ammo kunduzgi vaqtda iliqlik saqlanib turadi.
“Zamin”ni Telegramʻda oʻqing!
