Moskva shahridagi «Prokshino» turar-joy majmuasida kecha kechqurun katta mojaro yuz berdi — guvohlarning aytishicha, o‘nlab odamlar qatnashgan ommaviy mushtlashuvda belkurak, tayoq va hatto yo‘l belgilari ishlatilgan. Hodisa videolarda ham aks etgan va tez orada ijtimoiy tarmoqlarda keng tarqaldi.
Rossiya Ichki ishlar vazirligi rasmiy vakili Irina Volkning ma’lum qilishicha, voqea joyiga politsiya kuchlari yetib keldi va vaziyatni nazorat ostiga oldi. Hozirgi vaqtda 40 nafarga yaqin kishi ichki ishlar bo‘limiga olib kelingan. Ulardan kim mushtlashuvda bevosita ishtirok etganini aniqlash bo‘yicha surishtiruv ishlari olib borilmoqda.
Tergov ma’lumotlariga ko‘ra, mojaro oqibatida kamida to‘rt kishi turli darajadagi jarohatlar olgan. Shuningdek, janjal vaqtida bir necha to‘xtab turgan avtomobillar ham shikastlangan.
TASS agentligi xabar berishicha, mojaroga nima sabab bo‘lgani hozircha noma’lum. Ilk taxminlarga ko‘ra, kelishmovchilik maishiy holat yoki qurilish sohasidagi ishchi guruhlar o‘rtasidagi bahsdan kelib chiqqan bo‘lishi mumkin.
IIV rasmiy vakili Irina Volk ta’kidlashicha, hozircha qamoq jazosi tayinlanmagan chet el fuqarolari mamlakatdan chiqarib yuboriladi. Ularga keyinchalik Rossiya hududiga kirish taqiqlanadi.
«Ozodlikdan mahrum qilish jazosi qo‘llanilmagan fuqarolar belgilangan tartibda Rossiyadan deportatsiya qilinadi. Bu kelgusida ularning qayta kirishiga ham to‘siq bo‘ladi», — dedi Volk rasmiy bayonotida.
Huquqni muhofaza qiluvchi organlar mojaro bo‘yicha Rossiya Jinoyat kodeksining «Bezorilik» moddasi asosida jinoyat ishini qo‘zg‘atgan. Ushbu modda bo‘yicha eng katta jazo yetti yilgacha ozodlikdan mahrum qilishni nazarda tutadi.
Moskva politsiyasi hozircha barcha ishtirokchilarning shaxsini aniqlash, voqeaning sabablarini va tashabbuskorlarini belgilash bilan shug‘ullanmoqda.
“Zamin”ni Telegramʻda oʻqing!
