8 yanvar kuni Quyoshda yirik portlash sodir bo‘ldi. Bu haqda Markaziy Osiyo (CA) – Quyosh astronomiyasi laboratoriyasi rasmiy xabar berdi. Mutaxassislar qayd etishicha, kun o‘rtalariga yaqin Quyoshda kuchli faollik kuzatilgan va koronograflar orqali olingan kadrlarda moddaning turli yo‘nalishlarga yuqori tezlikda otilib chiqqani aniq ko‘ringan.
Laboratoriya ma’lumotiga ko‘ra, ushbu portlashning asosiy manbai Quyoshning bizga ko‘rinmaydigan — orqa tomonida joylashgan. Shu sababli hozircha hech bir sun’iy yo‘ldosh bu jarayonni to‘g‘ridan to‘g‘ri “yuzma-yuz” holatda kuzata olmagan. Ya’ni portlash bor, lekin u Yer tomon qaramagani uchun aniq detallar hozircha faqat kosmik asboblar orqali taxmin va tahlil yo‘li bilan baholanmoqda.
Hisobotda ta’kidlanishicha, ikki hafta oldin hozir ko‘rinmayotgan Quyosh qismi Yerga qaragan paytda u yerda alohida xavotirli yoki favqulodda holatlar qayd etilmagan. Faqat o‘rta darajadagi bir nechta faol chaqnashlar kuzatilgan, xolos. Shuning o‘zi ham astronomlarga hozirgi portlash aynan qaysi hudud bilan bog‘liq bo‘lishi mumkinligini taxmin qilishga turtki bo‘lyapti.
Mutaxassislarning izohi bo‘yicha, agar bu portlash o‘sha faol hududlardan biri bilan bog‘liq bo‘lsa, chiqish yo‘nalishiga qaraganda, yorqin chaqnash Quyosh diskining ko‘rinib turgan qismida — ekvatordan pastda, o‘ng tomonda joylashgan dog‘lar guruhi atrofida bo‘lgan bo‘lishi ehtimoli bor. Lekin bu hozircha faqat mantiqiy xulosa: portlash nuqtasini bevosita ko‘z bilan ko‘rish uchun vaqt kerak.
Eng qiziq joyi shundaki, portlash joyi taxminan bir haftadan keyin aniqroq ko‘rina boshlashi mumkin. Chunki dog‘lar guruhi Quyoshning chap ufqi ortidan aylanib, Yer tomonga “chiqib kelish”ni boshlaganda, olimlar manbani to‘liqroq kuzatish imkoniga ega bo‘ladi. Ana o‘shanda “bu portlash qayerdan chiqdi?” degan savolga aniqroq javob paydo bo‘ladi.
“Zamin”ni Telegramʻda oʻqing!
