Yer yuzidagi maxluqotlarning adadi

Yer yuzidagi maxluqotlarning adadi kishini lol qoldiradi. O‘tkazilgan yangi tadqiqotlarga ko‘ra, Yer yuzida trillion turli tirik jonzot yashar ekan. Bu turli tumanlik va ulkan adad Alloh taoloning qudratiga dalolat qiladi va evolyutsiya nazariyasi tarafdorlarini parishon qiladi.

www.livescience.com saytida Yer sharida yashovchi tirik jonzotlarning adadi e’lon qilindi. Ilm-fan rivojlanganiga qaramay, olimlar hozirgacha sayyoramizda yashaydigan tirik jonzotlarning soni qancha ekanini bilmasdilar. Ular tirik jonzotlarning ko‘pidan bexabar edilar.

Indiana universiteti (Indiana University) olimlari Yer yuzida yashovchi tirik jonzotlarni hisoblab chiqdilar va bir ovozdan “Sayyoramizdagi tirik jonzotlarning turi trilliontaga yetar ekan” deb ta’kidlashyapti. Bu adad evolyutsiyachilar o‘ylaganidan ancha ko‘pdir.

Inson jismining o‘zida 100 trilliondan ko‘proq tirik hujayra bor ekan. Yer yuzida nonillion (1 raqamidan keyin 30 ta nol) atrofida tirik bakteriya bor ekan.

2013 yilda “Ilmlar” nomli jurnalda bir tadqiqot xulosasi e’lon qilindi. Unda ushbu gaplar bor edi: “Biz 50 mlrd dollar sarflab, 50 yil davomida muntazam ravishda tadqiqot olib borsak, o‘shanda Yer yuzida tarqalgan barcha jonzotlar hayotini o‘rganib, ularning tabiatini tushuna olishimiz mumkin”.

Evolyutsiyachilar “Yer yuzi har yili 200 turli yangi jonzotlarni paydo qiladi” deb safsata sotishadi. Insoniyat yuz yillardan beri ilmiy bahslar, tadqiqotlar olib boradi. Shuncha yillar mobaynida birorta yangi jonzot paydo bo‘lgani yo‘q. Xo‘sh, unda bu trillion turdagi jonzotlar qayerdan kelib qoldi?!

Turli safsatalar bilan boshimizni og‘ritayotgan kimsalarga qarata aytamizki, sizlar oldin borib, mazkur trillion turli jonzotlarni o‘rganinglar. Sizlar hozirgacha faqat 100 ming turdagi jonzotni, bakteriyani o‘rgandingiz, xolos. Qani aytinglarchi, jonzotlar turining soni trillionga yetguniga qadar ular har daqiqada nechta bosqichni bosib o‘tdi ekan?

Ular trillion turga yetgunicha necha yil vaqt ketdi ekan? Agar sizlar yaxshilab o‘rgansangiz, buncha adaddagi tur paydo bo‘lgunicha koinotning umri yetmasligini anglab yetasizlar. Ana o‘shanda bu jonzotlarning barchasini yaratgan Alloh taoloning O‘zi ekanini, ular bir bosqichdan boshqasiga o‘tib bu holga kelmaganini, balki, ularning har birini Alloh taolo O‘zining qudrati bilan shunday ko‘rinishda va shu adadda yaratganini e’tirof qilishdan o‘zga chorangiz qolmaydi.

Alloh taolo Qur’oni Karimda shunday marhamat qilgan:

“Alloh hamma jonivorni suvdan yaratdi. Bas, ulardan ba’zilari qorni bilan yuradir, ba’zilari ikki oyoq bilan yuradir va ba’zilari to‘rt (oyoq) bilan. Alloh O‘zi xohlagan narsani yaratur. Albatta, Alloh har bir narsaga qodirdir” (Nur surasi, 45-oyat).

Manba: Muslim.uz “Zamin” yangiliklarini “Instagram”da kuzatib boring