“Manchester Siti”da o‘ng flangdagi vaziyat yaxshi tomonga o‘zgarmoqda. Sky Sports ma’lumotiga ko‘ra, Abduqodir Husanovning ishonchli o‘yinlari sabab klub yangi o‘ng qanot himoyachisini olish rejasini orqaga surdi — kamida kelasi yozgacha. Bu, avvalo, o‘zbekistonlik yosh legionerning Pep Gvardiola ishonchini qisqa muddatda qozonganidan darak.
Hozircha bu pozitsiyada variantlar yetarli: Husanovdan tashqari Riko Lyuis ham bor, ayrim holatlarda esa Mateus Nunes ham o‘ng tomonda yordam bera oladi. Shunday ekan, shtab qishda transfer oynasini “himoya”ga emas, jamoaning boshqa ehtiyojlariga qaratishi mumkin.
Albatta, muxlislarni o‘ylantirayotgan yana bir jihat bor: 21 yoshli Husanov hozir jarohatdan tiklanish bilan band va bir nechta o‘yinni o‘tkazib yuborishi aniq. Shunga qaramay, klub ichida unga berilayotgan baholar ijobiy — qaytganidan so‘ng yana asosiy tarkibga da’vogarlar qatorida bo‘ladi.
Qisqasi, “shaharliklar” Husanov atrofidagi ishonchli rotatsiya va ichki raqobatdan mamnun. Yangi himoyachiga ehtiyoj qolmadi, demak, Abduqodir uchun asosiy maqsad — sog‘lom sharoitda qaytib, mavsumning muhim pallalarini ham shunchaki ishonch bilan o‘tash. Muxlislar esa uning yangi parvozini intiqlik bilan kutishyapti.
“Zamin”ni Telegramʻda oʻqing!
