Qozog‘istonning Olmaota shahridagi chegara xizmati bo‘linmasida bir hafta oldin muddatli harbiy xizmatga chaqirilgan askar Nurasil Anuar to‘satdan vafot etdi. Bu haqda “Tengrinews” xabar berdi.
Uning oilasi 5-oktyabr kuni ertalab o‘lim haqida xabar olgan. Oilaning ma’lum qilishicha, Nurasil 2025-yil 27-sentyabrda “Qorasoy” chegara bo‘linmasida xizmatga kirgan va bir haftadan keyin olamdan o‘tgan.
O‘limning dastlabki sababi qarindoshlar so‘zlariga ko‘ra, meningit deb ko‘rsatilgan, ammo oilada shubha bor: bir hafta oldin Nurasil butunlay sog‘lom edi va kasallik haqida xabar berilmagan.
“Bugun ertalabdan beri jasadni ko‘ra olmayapmiz. Uni boshqa joyga yuborishyapti”, dedi bolaning xolasi jurnalistga. Qarindoshlar barcha holatlar xolis va to‘liq tekshirilib, zarur choralar ko‘rilishini so‘ramoqda.
Oila a’zolari Nurasilni mehribon, samimiy va rostgo‘y, hayotni sevar odam sifatida ta’riflab, uning vafoti ular uchun o‘rnini to‘ldirib bo‘lmaydigan yo‘qotish ekanini ta’kidlashdi.
Bundan avval Mang‘istau viloyatida egizak akasi ortidan harbiy xizmatga borgan Dinmuhammad ismli askar ham halok bo‘lgan edi. Ular avval bir qismda xizmat qilgan, keyin biri boshqasiga ko‘chirilgan. 17-sentyabr kuni oilasiga uning vafoti haqida xabar berilgan, dastlabki ma’lumotlarga ko‘ra, askar o‘z joniga qasd qilgan, ammo qarindoshlari bu holatga ishonmagan.
Keyinroq Mudofaa vaziri o‘rinbosari Serik Borambayev Dinmuhammadning o‘limiga izoh berib, aka-uka bir-biridan ajralmaganini ta’kidladi.
Eslatib o‘tamiz, avvalroq Olmaotadagi Milliy gvardiya harbiy xizmatchisi ham o‘z xizmat qilayotgan harbiy qismdagi binoning uchinchi qavatidan o‘zini pastga tashlagan.
“Zamin”ni Telegramʻda oʻqing!
