Joriy yilning yanvar–sentyabr oylarida O‘zbekistonda demografik o‘sish barqaror va yuqori sur’atlarda davom etdi. Rasmiy ma’lumotlarga ko‘ra, mamlakat hududlari orasida eng ko‘p chaqaloq Samarqand viloyatida dunyoga kelgan. Bu haqda Milliy statistika qo‘mitasi axborot taqdim etdi.
Hududlar kesimida o‘tkazilgan tahlil natijasida Samarqand viloyati tug‘ilish ko‘rsatkichi bo‘yicha yetakchi bo‘lib chiqdi. Mazkur viloyatda to‘qqiz oy davomida jami 80 903 nafar chaqaloq tug‘ilgan. Ikkinchi pog‘onani Qashqadaryo viloyati egallab, u yerda 75 116 ta tug‘ilish qayd etilgan. Uchinchi o‘rinda esa Farg‘ona viloyati bo‘lib, 74 614 nafar chaqaloq dunyoga kelgan.
Shuningdek, Surxondaryo viloyatida 61 128 ta, Andijon viloyatida 60 131 ta va Namangan viloyatida 57 881 ta yangi tug‘ilish qayd etilgan. Bu ko‘rsatkichlar mazkur hududlarda ham aholi soni o‘sishi faol davom etayotganidan dalolat beradi.
Toshkent viloyatida to‘qqiz oy ichida 49 007 ta chaqaloq tug‘ilgan bo‘lsa, poytaxt Toshkent shahrida bu ko‘rsatkich 47 703 tani tashkil etgan. Nisbatan pastroq natijalar Xorazm viloyatida – 33 011 ta va Buxoro viloyatida – 32 624 ta tug‘ilish hissasiga to‘g‘ri kelgan.
Qolgan hududlar orasida Qoraqalpog‘iston Respublikasida 29 523 ta, Jizzax viloyatida 28 484 ta, Navoiy viloyatida 18 594 ta va Sirdaryo viloyatida 15 879 ta chaqaloq dunyoga kelgani qayd etilgan.
Mutaxassislar ushbu raqamlar mamlakatda aholi soni o‘sishi hanuz dolzarb va barqaror tendensiya bo‘lib qolayotganini ko‘rsatayotganini ta’kidlamoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
