Toshkent shahrining Sergeli tumanida gaz ta’minoti bo‘limida ishlovchi mas’ul shaxs 21 ming AQSH dollari olayotgan vaqtda qo‘lga olindi. Holat huquqni muhofaza qiluvchi organlar tomonidan o‘tkazilgan tezkor tadbir davomida fosh etilgan.
Ma’lum qilinishicha, ushbu shaxs tuman hududida joylashgan, hujjatlari qonuniy tartibda rasmiylashtirilmagan savdo shoxobchasi masalasida murojaatchiga “yordam” berishni va’da qilgan. U tanishlari orqali mazkur savdo do‘konini 16 ming dollar evaziga rasmiylashtirib berishini aytgan.
Bundan tashqari, u savdo shoxobchasiga gaz tarmog‘ini ulash uchun ruxsatnoma olib berishni ham va’da qilib, buning uchun yana 5 ming dollar talab qilgan. Shu tariqa umumiy so‘ralgan summa 21 ming AQSH dollarini tashkil etgan.
Mas’ul shaxs ushbu mablag‘ni murojaatchidan olayotgan vaqtda ashyoviy dalillar bilan ushlangan. Bu holat xizmat vakolati, tanish-bilishchilik va noqonuniy yo‘llar orqali masalani hal qilishga urinish qanday og‘ir oqibatlarga olib kelishini yana bir bor ko‘rsatmoqda.
Holat yuzasidan Jinoyat kodeksining 168-moddasi to‘rtinchi qismi “a” bandi, ya’ni juda ko‘p miqdorda firibgarlik, hamda 211-moddasi birinchi qismi, ya’ni pora berish alomatlari bilan jinoyat ishi qo‘zg‘atilgan.
Ayni paytda tergov harakatlari davom etmoqda. Voqeaga aloqador boshqa shaxslar bor-yo‘qligi, va’da qilingan “tanishlar” kimlar ekani va mablag‘ qanday maqsadda talab qilingani huquqiy tartibda o‘rganiladi.
Bunday holatlar fuqarolarga ham muhim saboq bo‘ladi: hujjat, ruxsatnoma yoki kommunal tarmoqqa ulanish masalalari faqat qonuniy yo‘l bilan hal qilinishi kerak. “Tanish orqali tez bitadi” degan yo‘l ko‘pincha tez emas, to‘g‘ri sudga olib boradi.
“Zamin”ni Telegramʻda oʻqing!
