Elon Musk asos solgan SpaceX kompaniyasining Starlink sunʼiy yoʻldosh tizimi bugungi kunda dunyoning 160 dan ortiq mamlakatida 12 milliondan ziyod faol abonentga yuqori tezlikdagi internet xizmatini koʻrsatmoqda. Kompaniya atigi 53 kun ichida bir million yangi foydalanuvchini jalb qilishga muvaffaq boʻldi. Bu haqda Ixbt.com xabar beradi.
Hozirgi kunda orbitada 10 300 ta sunʼiy yoʻldosh mavjud boʻlib, kompaniya yil oxirigacha foydalanuvchilar sonini 25 millionga yetkazishni rejalashtirmoqda. Kelgusi avlod sunʼiy yoʻldoshlari esa oʻtkazuvchanlik qobiliyatini 100 barobar oshirib, gigabit tezlikdagi internetni taqdim etishi kutilmoqda.
Ookla tahlillariga koʻra, Starlink AQShda rekord darajadagi tezlikni qayd etgan. Koʻplab shtatlarda oʻrtacha yuklash tezligi 100 Mbit/s dan oshgan, kechikish (ping) darajasi esa 40 ms dan pastroq koʻrsatkichni tashkil etmoqda. Bu koʻrsatkichlar anʼanaviy kabel interneti bilan raqobatlashish imkonini beradi.
Mutaxassislarning prognozlariga koʻra, sunʼiy yoʻldosh interneti bozori jadal rivojlanishda davom etadi. Taxminlarga koʻra, Starlink foydalanuvchilari soni ikki yildan soʻng 100 milliondan, toʻrt yildan keyin esa 200 milliondan oshishi mumkin.
“Zamin”ni Telegramʻda oʻqing!
