Sakkiz yil avval ishlab chiqarilgan Nvidia Tesla V100 grafik tezlatgichi sunʼiy intellekt modellarini lokal ishga tushirishda hamon yuqori samaradorlik koʻrsatmoqda. Hardware Haven kanali muallifi oʻtkazgan testlar shuni koʻrsatdiki, ushbu eski server kartasi hatto RTX 3060 12 GB va Radeon RX 7800 XT 16 GB kabi zamonaviy modellardan ham tezroq ishlaydi. Bu haqda Ixbt.com xabar beradi.
Hozirda ikkilamchi bozorda taxminan 100 dollarga topish mumkin boʻlgan Tesla V100 oddiy shaxsiy kompyuterga oʻrnatish uchun SXM-to-PCIe adapteri, alohida quvvat manbai va 3D-printerda chop etilgan sovutish tizimini talab qiladi. Barcha qoʻshimcha jihozlar bilan birga yigʻilgan tizimning umumiy qiymati 235 dollarni tashkil etdi.
Test natijalariga koʻra, GPT-oss 20B modelida Tesla V100 soniyasiga 130 ta token ishlab chiqardi, bu Radeon RX 7800 XT (90 token/s) koʻrsatkichidan sezilarli darajada yuqori. Shuningdek, Gemma4:e4b modelida ham u RTX 3060 12 GB kartasini 108 va 76 token/s nisbatida ortda qoldirdi.
Ushbu kartaning asosiy ustunligi HBM2 xotirasining yuqori oʻtkazuvchanlik qobiliyatida va aynan hisoblash jarayonlariga moslashtirilganligidadir. Garchi oʻrnatish jarayoni murakkab boʻlsa-da, server GPU'lari sunʼiy intellekt ishqibozlari uchun juda foydali va arzon yechim boʻlib qolmoqda.
Mutaxassislar 32 GB xotiraga ega Tesla V100 versiyalariga ham eʼtibor qaratishni tavsiya qilmoqda. 400–500 dollar atrofida sotiladigan bu modellar ogʻirroq LLM-modellarni lokal tarzda ishga tushirish uchun qimmatbaho zamonaviy RTX kartalariga munosib muqobil boʻlishi mumkin.
“Zamin”ni Telegramʻda oʻqing!
