TikTok Buyuk Britaniya foydalanuvchilari uchun oylik to‘lovi 3,99 funt sterling (taxminan 5,44 dollar) bo‘lgan reklamasiz obuna rejasini taqdim etdi. Ushbu yangi xizmat yaqin oylar ichida bosqichma-bosqich joriy etiladi va undan faqat 18 yoshdan oshgan foydalanuvchilar foydalanishlari mumkin. Bu haqda Techcrunch.com xabar beradi.
Obuna bo‘lgan foydalanuvchilar platformada hech qanday reklama ko‘rmaydilar. Shuningdek, ularning shaxsiy ma’lumotlari reklama maqsadlarida qayta ishlanmaydi. Mazkur qadam Buyuk Britaniyaning GDPR (Umumiy ma’lumotlarni himoya qilish reglamenti) talablariga moslashish maqsadida amalga oshirilgan bo‘lishi mumkin, chunki qonun kompaniyalarga foydalanuvchi roziligisiz reklama uchun ma’lumot yig‘ishni taqiqlaydi.
TikTok’ning Buyuk Britaniyadagi boshqaruvchi direktori Kris Boge ushbu yangilikni sharhlar ekan, platforma hamjamiyat uchun tanlov imkoniyatini kengaytirayotganini ta’kidladi. Uning so‘zlariga ko‘ra, reklamasiz reja foydalanuvchilarga o‘z tajribasini nazorat qilish imkonini beradi, shu bilan birga biznes uchun reklama imkoniyatlari o‘z kuchida qoladi.
TikTok ushbu obuna modelini dastlab 2023-yilda sinovdan o‘tkazishni boshlagan edi. Hozircha ijtimoiy tarmoq giganti ushbu xizmatni AQSH yoki boshqa mamlakatlarda ham joriy etishni rejalashtirayotgani haqida aniq ma’lumot yo‘q.
“Zamin”ni Telegramʻda oʻqing!
