2026 yil 3 yanvar kuni soat 02:41 da (Toshkent vaqti bilan) Saudiya Arabistoni chempionatining 13-turida Krishtianu Ronaldu maydonga tushgan “Al-Nasr” Jiddada “Al-Ahli”ga 2:3 hisobida magʻlub bo‘ldi. Uchrashuv gollarga boy va keskin vaziyatlarga boy tarzda o‘tdi. Bu haqda kursiv.uz xabar beradi.
Mezbonlar o‘yinni faol boshladi va erta hisobni ochdi. Ayven Toni mehmonlar himoyasidagi xatolardan ikki bor unumli foydalanib, “Al-Ahli”ni 20-daqiqaga borib 2:0 hisobida oldinga olib chiqdi. Ikkinchi gol epizodida raqibning chuqur zonadagi joylashuvi va o‘yinni tashkil etishidagi sustlik hal qiluvchi omil bo‘ldi.
“Al-Nasr” esa standart vaziyatlar evaziga o‘yinga qaytdi. Abdullela al-Amri avvaliga uzoqdan yo‘llagan zarbasi rikoshet orqali darvozaga kirib bordi, keyin esa Brozovichning burchak to‘pidan uzatmasidan so‘ng hisobni tenglashtirdi. Tanaffusga jamoalar 2:2 natija bilan yo‘l oldi.
Ikkinchi bo‘limda “Al-Ahli” yana tashabbusni qo‘lga oldi: Merih Demiral jarima zarbasidan oshirilgan to‘pni yakunlab, hisobni 3:2 ko‘rinishiga keltirdi. Ronaldu bir necha bor, jumladan, bosh bilan va jarima maydoni chizig‘idan zarba berib, vaziyatlardan foydalana olmadi.
Qo‘shimcha daqiqalarda o‘yin nazoratdan chiqdi. Ali Majrashi Juaun Felishning yuziga zarba bergani uchun to‘g‘ridan-to‘g‘ri qizil kartochka oldi, Felish esa ushbu epizoddan keyin sariq kartochka bilan jazolandi. Biroz o‘tib VAR Navof al-Bushayl ishtirokidagi holatga aralashdi: hakamga xato ko‘rsatilgach, yana bir qizil kartochka namoyish etildi. Yakuniy daqiqalar ommaviy tortishuvlar va tez-tez to‘xtashlar fonida yakunlandi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
