Germaniya Bundesligasining 22-turi “Signal Iduna Park”da bo'lib o'tgan “Borussiya” Dortmund – “Maynts” uchrashuvi bilan boshlandi. Mezbonlar ilk daqiqalardanoq bosimni kuchaytirib, o'yin taqdirini tezda hal qildi. Bu haqda euro-football.ru xabar beradi.
10-daqiqada Yulian Ryersonning uzatmasidan so'ng Seru Girassi bosh bilan hisobni ochdi. Oradan besh daqiqa o'tib, Ryersonning navbatdagi aniq krossi Maximilian Bayerga gol urish imkonini berdi — 2:0. Birinchi bo'lim yakuniga yaqin Girassi yana Ryersonning pasidan foydalandi va dubl qayd etib, tanaffusga 3:0 hisobida olib chiqdi.
Ikkinchi bo'limda “Maynts” darvozaboni bir necha bor jamoasini qutqarib qoldi: Feliks Nmechaning xavfli zarbasi qaytarildi, burchakdan keyin Sheraldo Beker yo'llagan to'pda ham posbon hushyor bo'ldi. Biroq 84-daqiqada Ryerson ijro etgan navbatdagi burchak zarbasidan so'ng Dominik Kor to'pni o'z darvozasiga kiritib yubordi — 4:0.
Yirik g'alabadan keyin “Borussiya” turnir jadvalida “Bavariya”dan atigi uch ochko ortda qoldi. “Maynts” esa pastki qismda, oxiridan beshinchi o'rinda turibdi.
“Zamin”ni Telegramʻda oʻqing!
