Barselona jamoasi mavsum yakunlanishi bilan transfer bozorida faollikni oshirdi. Kataloniyaliklar bir vaqtning oʻzida uchta yirik transferni amalga oshirishga yaqin turibdi. Xabarlarga koʻra, Nyukasl Yunayted vingeri Anthony Gordon uchun 80 million yevrolik kelishuv deyarli yakunlangan va futbolchi tibbiy koʻrikdan oʻtib boʻlgan. Bu haqda Goal.com xabar beradi.
Shu bilan birga, Atletiko Madrid hujumchisi Julian Alvarez ham kutilmaganda jamoasini tark etishi mumkin. Insayder Fabrizio Romano xabariga koʻra, futbolchi ketishni soʻragan va Barselona allaqachon 100 million yevrolik rasmiy taklif yuborgan. Ushbu transferning bir qismi sifatida kataloniyaliklar oʻz tarbiyalanuvchisi Marc Casadoʻni Madrid klubiga berib yuborishi kutilmoqda.
Eng shov-shuvli xabarlardan biri esa Bernardo Silva bilan bogʻliq. Manchester Siti bilan shartnomasi 30-iyun kuni yakuniga yetadigan 31 yoshli yarim himoyachi Kataloniyaga koʻchib oʻtishga tayyor. Portugaliyalik yulduz Manchester Siti safida 9 mavsum davomida 460 ta oʻyinda maydonga tushib, 76 ta gol va 77 ta assist muallifiga aylangan edi.
A Bola nashrining yozishicha, Bernardo Silva Barselona safiga qoʻshilish uchun hatto maoshining sezilarli darajada kamayishiga ham rozi boʻlgan. Uning agenti Jorge Mendes qishdayoq klub bilan muzokaralarni boshlagan edi. Silva kataloniyaliklar safiga qoʻshilishni oʻzining azaliy orzusi deb hisoblaydi va bu transfer amalga oshishiga yaqin turibdi.
“Zamin”ni Telegramʻda oʻqing!
