Real Madrid yulduzi Vinicius Junior o‘zining ijtimoiy tarmoqlardagi sahifasi orqali influencer Virginia Fonseca bilan munosabatlari uzilganini rasman tasdiqladi. Bir yil davom etgan ishqiy munosabatlardan so‘ng, braziliyalik hujumchi o‘z his-tuyg‘ularini ochiq bayon etdi. Bu haqda Goal.com xabar beradi.
Instagram sahifasida birgalikdagi suratni joylagan 25 yoshli futbolchi sobiq sevgilisiga minnatdorchilik bildirdi. Vinicius o‘z xabarida: "Hammasi uchun rahmat! Sen bilan o‘tkazgan har bir lahzam va olgan saboqlarim unutilmas bo‘lib qoladi. Senga hayotda faqat muvaffaqiyat va baxt tilayman", — deya yozib qoldirdi.
Virginia Fonseca esa bu ajralish haqida bir necha kun avvalroq ma’lum qilgan edi. U o‘z bayonotida munosabatlar davomida o‘zligini saqlab qolishga harakat qilganini va har doim samimiy yashashni afzal ko‘rishini ta’kidladi.
Shaxsiy hayotidagi bu o‘zgarishlardan so‘ng, Vinicius Junior diqqatini yana maydondagi vazifalariga qaratishi kutilmoqda. Real Madrid safida La Liga doirasidagi so‘nggi o‘yinni o‘tkazgach, futbolchi Braziliya terma jamoasi safida 2026-yilgi Jahon chempionati saralash bahslariga tayyorgarlikni boshlaydi.
“Zamin”ni Telegramʻda oʻqing!
