Barselona Ez Abdeni qaytarmoqchi: Xansi Flik futbolchidan hayratda
Kataloniyaning Barselona klubi o'zining sobiq futbolchisi, hozirda Real Betis safida to'p surayotgan Ez Abdeni o'z safiga qaytarish variantini ko'rib chiqmoqda. Bosh murabbiy Xansi Flik jamoalar o'rtasidagi o'yinda marokashlik vingerning harakatlaridan juda mamnun bo'ldi va uning o'yin uslubidan hayratda qoldi. Shartnomada kataloniyaliklarning futbolchini qaytarib sotib olish huquqini saqlab qolgani ushbu transferni amalga oshirishda asosiy omil bo'lishi mumkin.
Barselona klubi o‘zining sobiq futbolchisi, hozirda Real Betis sharafini himoya qilayotgan marokashlik vinger Ez Abdeni qaytarish variantini ko‘rib chiqmoqda. Cadena SER xabariga ko‘ra, jamoa bosh murabbiyi Xansi Flik futbolchining o‘yin uslubidan juda mamnun. Bu haqda Goal.com xabar beradi.
Mutaxassis yakshanba kuni bo‘lib o‘tgan Barselona va Real Betis o‘rtasidagi bahsni diqqat bilan kuzatib bordi. Uchrashuvda Abde ayniqsa birinchi bo‘limda faol harakat qilib, himoyachi Jules Koundega ko‘p qiyinchiliklar tug‘dirdi. Garchi uning kiritgan goli ofsayd sababli bekor qilingan bo‘lsa-da, futbolchining maydondagi harakatlari murabbiylar shtabida ijobiy taassurot qoldirdi.
Ez Abde 2021-yildan 2023-yilgacha Barselona tarkibida bo‘lgan, biroq asosiy tarkibdan joy ololmagach, Osasunaga ijaraga berilgandi. Keyinchalik kataloniyaliklar uni 7,5 million yevro evaziga Real Betisga sotib yuborishgan. Shartnomada klub futbolchini qaytarib sotib olish huquqini saqlab qolganligi transferni amalga oshirishda asosiy omil bo‘lishi mumkin.
Hozirgi vaqtda futbolchining kelajagi borasida turli xil fikrlar mavjud. Abde Barselonada zaxira o‘yinchisi bo‘lishga rozi bo‘ladimi yoki yo‘q, bu hali noma’lum. Shuningdek, vingerga Angliya Premer-ligasining bir qator klublari ham qiziqish bildirmoqda.
Barselona yozgi transfer oynasida tarkibni kuchaytirish maqsadida ham vinger, ham markaziy hujumchi izlamoqda. Shu bilan birga, jamoada ijarada o‘ynayotgan Markus Reshfordning kelajagi hamon mavhumligicha qolmoqda, uning transfer narxi esa 30 million yevroga baholanmoqda.
Izohlar 0
…